ގަމު ދާއިރާގެ މެންބަރު ޔޫސުފް ނަޝީދު ހުށަހެޅުއްވި މި ބިލުގައި، މަސްތުވާތަކެތީގެ ވިޔަފާރިއަށް ފައިނޭންސްކުރާ ފަރާތްތަކަށް 20 އަހަރުގެ ޖަލު ހުކުމާއި އެއް މިލިއަން ރުފިޔާއާ ހަމައަށް ޖޫރިމަނާ ކުރެވޭނެ އެވެ. އަދި މަސްތުވާތަކެތި ބޭނުންކުރުމަށް ތަނެއް ހުއްދަކުރާ ފަރާތްތަކަށް 10 އަހަރުގެ ޖަލު ހުކުމާއި 200،000 ރުފިޔާގެ ޖޫރިމަނާ ކުރެވޭނެ އެވެ.
މި ބިލާ ގުޅޭ ގޮތުން ހިޔާލު ހުށަހެޅުމުގެ ފުރުސަތު މި މަހުގެ 31 ވަނަ ދުވަހުގެ މެންދުރު 12:00 އާ ހަމައަށް އޮންނާނެ އެވެ. ހިޔާލު ހުށަހަޅަން ބޭނުންވާ ފަރާތްތަކަށް ޖުޑީޝަރީ ކޮމިޓީގެ އީމެއިލް ނުވަތަ މަޖިލީހުގެ އިދާރާއަށް ލިޔުމުން ހުށަހެޅިދާނެ އެވެ.
މި ބިލުގެ އިބްތިދާއީ ބަހުސްގައި ގިނަ މެންބަރުން ވަނީ، ގާނޫނުތައް ހެދުނު ކަމުގައި ވިޔަސް އެކަށީގެންވާ ގޮތެއްގައި ތަންފީޒު ނުކުރެވޭ ކަމަށް ފާހަގަކޮށްފަ އެވެ. އަދި ތަންފީޒީ އިދާރާތަކުން ކުށްވެރިންނަށް އެކަށީގެންވާ އަދަބު ނުލިބޭކަން ވެސް މެންބަރުން ވަނީ ފާހަގަކޮށްފަ އެވެ.
