
ހުޅުމާލޭ ރުއްގަނޑު ސަރަހައްދުގައި ކުރި އިހުތިޖާޖުގައި ޑްރައިވަރުން ބުނީ ސަރުކާރުގެ ޓެކްސީ ފްލީޓު ވުޖޫދަށް ގެނައުމުން އޭގެ ސީދާ ގެއްލުން ޑްރައިވަރުންނާއި ޓެކްސީ ސެންޓަރުތަކާއި ގަރާޖުތަކަށް ކުރާނެ ކަމަށެވެ.
އިހުތިޖާޖުގައި ބައިވެރިވި ޑްރައިވަރެއް ބުނީ އެމީހުންނަށް ޚިދުމަތް ނުދެވެނީ ނުކުޅެދުންތެރިކަމެއް ހުރެގެން ނޫން ކަމަށާއި ސަރުކާރުގެ މުއައްސަސާތަކުގައި ތިބޭ ބޭފުޅުންގެ ޒިންމާދާރުކަން ކުޑަވުމުން ކަމަށެވެ.
ޓްރާންސްޕޯޓު މިނިސްޓަރު އަމީނާ އާ ބައްދަލުކުރި ނަމަވެސް އެއްވެސް ހައްލެއް ލިބިފައި ނުވާ ކަމަށް ޑްރައިވަރުން ބުނެއެވެ. އަދި ރައީސް މުހައްމަދު މުއިއްޒު އާ ބައްދަލުކުރަން އެދުމުން އެ ބައްދަލުވުން ކުއްލިގޮތަކަށް ކެންސަލްކޮށްލި ކަމަށް ވެސް ބުނެއެވެ.
މި އިހުތިޖާޖުގައި ޑްރައިވަރުން އެދެނީ ސަރުކާރުގެ ޓެކްސީ ފްލީޓު ވުޖޫދަށް ނުގެނައުމަށާއި، ވޭން ދަތުރުގެ އަގުތައް ކުރިން އޮތް ގޮތަށް ބަދަލުކުރުމަށާއި، މާލެ އަދި އެއަޕޯޓުގެ ޓްރެފިކް ފްލޯ ފަސޭހަވާނެ ގޮތަށް ހެދުމަށެވެ. މީގެ އިތުރުން ޓެކްސީ ޑްރައިވަރުންގެ ދަފްތަރު އަލުން ހުޅުވައިލުމަށާއި މާލޭގައި ޕާކު ކުރެވޭނެ ނިޒާމެއް ގާއިމްކުރުމަށް ވެސް ގޮވާލައިފަ އެވެ.