ހައުސިން މިނިސްޓްރީއާ އިންފްރަސްޓަރަކްޗާ މިނިސްޓްރީން ހިންގާ އިމާރާތުގައި އަލިފާން ރޯވީ ހެނދުނު 07:15 ކަންހާއިރުއެވެ. ވަށައިގެން ޓިނު ޖަހާ ހަދާފައިވާ މި އިމާރާތުގައި ރޯވި އަލިފާންގަނޑު ޖެހިގެން ހުރި އެންވަަޔަރަމަންޓް މިނިސްޓްރީއަށްވެސް ފެތުރި އެ މިނިސްޓްރީއަށްވެސް ވަނީ ބޮޑެތި ގެއްލުންތަކެެއް ވެފައެވެ.
ހައުސިން މިނިސްޓަރު ހައިދަރު ވިދާޅުވީ އަލިފާނުގެ ހާދިސާގައި ސަލާމަތްކުރެވުނީ ވަރަށް މަދު ލިޔުންތަކެއްކަމަށެވެ. އެހެންކަމުން ގެއްލުނު މަައުލޫމާތުތައް ސާވާ ޑިސްކު ނަގައިގެން ރިކަވާ ކުތެވޭތޯ ބަލަމުން އަންނަކަމަށެވެ.
އެތަކެތި ލިބިދާނެކަމުގެ މާ ބޮޑު އުއްމީދެއް ނެތަސް އެ މައުލޫމާތުތައް ހޯދަން ކުރަންޖެހުނު ކޮންމެ ކަމެއް ކުރާނެކަން މިނިސްޓަރު ހައިދަރު ވިދާޅުވިއެވެ. އެގޮތުން ސާވާ ޑިސްކު ބޭރަށް ފޮނުވަން ޖެހުނަސް އެކަންވެސް ކުރައްވާނެކަމަށް މިނިސްޓަރު ހައިދަރު ވިދާޅުވިއެވެ.
ވަޒީރު ވިދާޅުވީ ސަވާ ރިކަވާނުކުރެވުނު ނަމަވެސް ފްލެޓް ލިސްޓަށް އަސަރު ނުކުރާނެ ކަމަށެވެ. ފްލެޓް ލިސްޓާއި ގެދޮރުވެރިކަމާއި ބިންވެރިކަމުގެ ސްކީމާއި މައުލޫމާތުތައް ރައްކާ ކޮށްފައި ހުންނަނީ އިންޓާނެޓްގައި ގާއިމްކޮށްފައިވާ ކްލައުޑެއްގައި ކަމަށްވެސް މިނިސްޓަރު ވިދާޅުވިއެވެ.
އަލިފާނުގެ ހާދިސާއެއްގެ ސަބަބުން ތިން މިނިސްޓްރީގެ މަސައްކަތް ވަނީ ވަގުތީ ގޮތުން ހުއްޓިފައިވާތީ މި އޮފީސްތަކުގެ މަސައްކަތް ދަރުބާރުގެއަށް ވަގުތީ ގޮތުން ބަދަލުކުރަން ނިންމާ އެ މަސައްކަތް ވަނީ ފަށާފައެވެ. އަދި އަންނަ އާދިއްތަ ދުވަސް ފެށެންވާއިރަށް ހިދުމަތް ދެވޭވަރަށް އޮފީސްތަކުގެ ސެޓަޕްތައް ހަދާ ނިންމާލުމަށް ދަނީ މަސައްކަތް ކުރަމުންނެވެ.
