އެފްއެސްއެމްގެ އެމްޑީއަކަށް އާޝާން އައްޔަންކުރުމުން މީ އެސްޓީއޯގެ ކުޑަ ދަށުގައި ހިންގާ ކުންފުންޏެއްގެ އެމްޑީކަމަށް އަންހެނަކު އައްޔަންކުރި ފުރަތަމަ ފަހަރެވެ.
އާޝާން އަކީ އެސްޓީއޯގައި ޖެނެރަލް މެނޭޖަރުކަމުގެ މަގާމާއި އެޗްއާރުގެ ހެޑްކަން ފުރުއްވާފައެވެ. އެޣެ ފަހުން ރައީސް ޔާމީންގެ ވެރިކަމުގައި އާޝާން ވަނީ މިފްކޯގެ ޑެޕިއުޓީ ސީއީއޯގެ މަގާމުވެސް ފުރުއްވާފައެވެ.
އާޝާން ވަނީ 1993 އިން 1994 އަށް އޮސްޓްރޭލިއާގެ ހޯބާޓް އިންސްޓިޓިއުޓް އޮފް ޓެކްނިކަލް އެންޑް ފާދާ އެޑިއުކޭޝަންގައި ފުރިހަމަ ކުރެއްވި ބިޒްނަސް (އިންފޮމޭޝަން ޓެކްނޮލޮޖީ) ޑިޕްލޮމާ ކޯހުން އެ އިންސްޓިޓިއުޓްގެ އެންމެ މޮޅު ގްރެޖުއޭޓްގެ މަގާމު ހޯއްދަވައި 1995 ގައި ސަރުކާރުން ދެއްވާ ހާއްސަ އިނާމު ކާމިޔާބު ކުރައްވާފަ އެވެ.
އޭގެއިތުރުން މެލޭޝިޔާގެ ކޭޑީޔޫ ކޮލެޖުގައި 2002 އިން ފެށިގެން 2003 އަށް މާސްޓާ އޮފް ބިޒްނަސް އެޑްމިނިސްޓްރޭޝަން ކޯހުން އެއްވަނަ ހޯއްދަވައި 2004 ގައި ސަރުކާރުން ދެއްވާ ހާއްސަ އިނާމު ވެސް އާޝާން ކާމިޔާބު ކުރައްވާފަ އެވެ.
އެފްއެސްއެމްގެ އެމްޑީކަމަށް އާޝާބން އައްޔަންކޮށްފައި މިވަނީ އެ މަގާމުގައި ކުރިން ހުންނެވި އިސްމާއީލް ސުހައިލް މިދިޔަ މަހުގެ 26 ވަނަދުވަހު އިސްތިފާދެއްވާފައި ވަނިކޮށެވެ. އޭނާ އިސްތިފާ ދެއްވި ސަބަބެއް ހާމަނުކުރި ނަމަވެސް އެނގިފައިވާ ގޮތުން ސުހައިލް އިސްތިފާދެއްވީ އޭނާއާ ގުޅޭ މައްސަލަތަކެއް އެސްޓީއޯއިން ބަލަމުން ދަނިކޮށެވެ.
އެފްއެސްއެމްގެ މުވައްޒަފުންތަކެއް އެތަނުގެ ތެލުން ވައްކަންކުރަމުން އަންނަ މައްސަލައެއް ދިވެހި ފުލުހުންގެ ހިދުމަތު އަންނަނީ ތަހުގީގުކުރަމުންނެވެ. މި މައްސަލާގައި އެ ކުންފުނީގެ 40 އަށް ވުރެ ގިނަ މުވައްޒަފުން ވަޒީފާއިން ވަކިކޮށްފަ އެވެ.
