ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ މި ޕްރޮގްރާމްގެ ސަބަބުން ފުލުހުންގެ ދީނީ ހޭލުންތެރިކަން އިތުރުވެ، އެމީހުންގެ މަސައްކަތަށް ފަސޭހަތަކެއް ލިބިގެންދާނެ ކަމަށެވެ. އަދި މުޖުތަމައުގެ އަމާންކަން ގާއިމްކުރުމަށްވެސް މި ޕްރޮގްރާމްގެ ސަބަބުން ފަސޭހަވެގެންދާނެ ކަމަށް އޭނާ ވިދާޅުވި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މުޖުތަމައުގައި އަމާންކަން ދެމެހެއްޓުމަށް ފުލުހުން ކުރަމުންދާ މަސައްކަތްތައް މިހާރު އިތުރުވެފައިވާ ކަމަށެވެ. އަދި އެ މަސައްކަތުގައި އިސްލާމިކް މިނިސްޓްރީން ދެވެން އޮތް އެހީތެރިކަމެއް ދޭނެ ކަމުގެ ޔަގީންކަން ދެއްވި އެވެ.
މި ޕްރޮގްރާމް ފެށުމަށް މަގުފަހިވީ މިއަދު އިސްލާމިކް މިނިސްޓްރީއާއި ފުލުހުންނާ ދެމެދު ސޮއިކުރި އެމްއޯޔޫގެ ދަށުންނެވެ. މި އެމްއޯޔޫގެ ދަށުން އެކި ދާއިރާތަކުން ދެ މުއައްސަސާގެ ދެމެދުގައި އެހީތެރިކަން ބަދަލުކުރެވޭނެ އެވެ.
