ކުއާޓާ ފައިނަލް މެޗުތައް ފަށާނީ ނަން މަޝްހޫރު އޭދަފުށްޓާއި ނައިފަރުގެ މެޗުން މިއަދު ހަވީރުއެވެ.
ދެވަނަ ބުރުގައި އެންމެ ސްޓައިލުގައި ކުއާޓާގެ ފުރުސަތު ހޯދި ޓީމަކީ އޭދަފުށްޓެވެ. ދިއްދޫ މެޗަށް ނުކުތްއިރު، ފުރަތަމަ މެޗުން ބަލިވެފައި އޮތުމުން، އޭދަފުށްޓަށް އޮތީ މަދުވެގެން ތިން ލަނޑުން މޮޅުވުމުގެ ޕްރެޝަރެވެ. އެކަމަކު ހުނަރުވެރި އެތައް ކުޅުންތެރިންނެއް އުފެއްދި އޭދަފުށިން އެ ޕްރެޝަރު ނެގިތަން ފެނުނީ ލުއިކޮށެވެ. ހަތަރު ލަނޑު ޖަހައިގެން ދިއްދޫ ކަޓުވާލުމުގެ އިތުރުން ގްރޫޕުގެ އެއްވަނަވެސް ހޯދީއެވެ. އޭދަފުށީގެ ގިނަ އަދަދެއްގެ ސަޕޯޓަރުންގެ އަޑާއެކު މުޅި ގަލޮޅު ދަނޑު ގުގުމާލި އެ ދުވަހު، އޭދަފުށްޓަކީ މުބާރާތުގެ ޗެމްޕިއަންކަން ހޯދޭ ފެންވަރުގެ ޓީމެއްކަން ދައްކާލިއެވެ.
ނައިފަރު ކުއާޓާއަށް ދިޔައީ، އައްޑޫ ސިޓީއާއި ދ. މީދޫއާ އެއް ގްރޫޕެއްގައި ހިމެނި އެ ގްރޫޕުގެ ދެވަނަ ޓީމުގެ ގޮތުގައެވެ. ކުއާޓާ ފައިނަލުން ފުރުސަތު ހޯދި ދެވަނަ ޓީމުގެ ގޮތުގައި ނައިފަރު ދިޔައީ ދ. މީދޫ ބަލިކޮށްގެންވެ. އެކަމަކު އެ ޓީމުވަނީ ބޮޑު ތަފާތަކުން އައްޑޫ އަތުން ބަލިވެފައެވެ.
ކުއާޓާ ފައިނަލް ދެވަނަ މެޗުގައި މިރޭ ބައްދަލުކުރާނީ މާލެ ސިޓީ އާއި ކ. ގުރައިދޫ އެވެ. މާދަމާ ހަވީރު ކުޅޭ މެޗުގައި ރ. އަލިފުއްޓާއި ފުވައްމުލަށް ސިޓީ ވާދަކުރާއިރު ކުއާޓާ ފައިނަލުގެ ފަހު މެޗުގައި މާދަމާ ރޭ ކ. މާފުށި ނުކުންނާނީ އައްޑޫ ސިޓީއާ ދެކޮޅަށެވެ.
