އުމުރުން 48 އަހަރުގެ ލެޖެންޑް، ބްރެޒިލްގެ ފުޓްބޯޅައިގެ ރައީސްކަމުގެ މަގާމަށް ކުރިމަތިލާން ނިންމިކަން ވެގެންދާނީ، މިހާރު އެ މަގާމުގައި ހުރި އެޑްނަލްޑޯއަށް އޮތް ގޮން ޖެހުމަކަށެވެ. ރިޕޯޓްތައް ބުނާ ގޮތުން، ކުރީގެ ކުޅުންތެރިޔާ އަދި މިހާރުގެ ވިޔަފާރިވެރިޔާ ރޮނާލްޑޯ ނަޒާރިއޯ ބޭނުންވަނީ ބްރެޒިލްގެ ފުޓްބޯޅަ ކޮންފެޑެރޭޝަންގެ ސީބީއެފްގެ ރައީސް ކަމާ ހަވާލުވެ، ދުނިޔޭގެ ފުޓްބޯޅައިގެ އެއްވަނަ މަގާމަށް ބްރެޒިލް އަލުން ގެންނާށެވެ.
ބްރެޒިލްގެ ފުޓްބޯޅައިގެ ރައީސް ހޮވުމަށް ބާއްވާ އިންތިހާބު އަންނަ އަހަރު އޮތްނަމަވެސް، މިހާރުގެ ރައީސްގެ ދައުރު ހަމަވާނީ 2026 ވަނަ އަހަރުއެވެ. ރިޕޯޓްތައް ބުނާ ގޮތުން، މިހާރުގެ ރައީސް އެޑްނަލްޑޯ އެ މަގާމު ދިފާއު ކުރަން ބޭނުންވެއެވެ.
ބްރެޒިލްގެ ފުޓްބޯޅައިގެ ރައީސްކަމުގެ މަގާމަށް ހުސްވުމަށްޓަކައި ރޮނާލްޑޯވަނީ ބްރެޒިލްގައި އޭނާ ގަނެފައިވާ ކްލަބު ވިއްކާލާފައެވެ. އަދި ސްޕެއިންގައި އޭނާ ގަނެފައިވާ ކްލަބުވެސް ވިއްކާލަން މިހާރު އަންނަނީ މަސައްކަތް ކުރަމުންނެވެ.
ބްރެޒިލްގެ ގައުމީ ޓީމަށް ކުޅުނު ރޮނާލްޑޯ ހުއްޓާލި ފަހުން، އެ ޓީމަށް އަދި ވޯލްޑްކަޕް ކާމިޔާބު ނުކުރެވެއެވެ. ރޮނާލްޑޯ ކުޅުން ހުއްޓާލި ފަހުން ކޮޕާ އެމެރިކާވެސް ބްރެޒިލްއަށް ކާމިޔާބު ކުރެވުނީ އެންމެ ފަހަރަކުއެވެ.
