އެ ޕާޓީން މިހުނެ ބުނީ ސައްހަނޫން ލިޔެކިޔުން އުފައްދާ ހުށަހަޅައިގެން، ބިންވެރިޔާ ސްކީމުގެ ތެރެއިން ހުޅުމާލޭގެ ބިމުން ވަގަށް ގޯތި ކަނޑާ، ދޫކޮށްފައިވާ މައްސަލައިގެ ޖިނާއީ ތަހުގީގު ހިންގުމަށް ގޮވާލާ ނެރުނު ނޫސް ބަޔާނެއްގައެވެ.
ގޯތީގެ ސައްހަ ނޫން ލިޔުން ތައްޔާރުކޮށްގެން އިންފާރު ރާނަން އެދުނު ހިސާބުންވެސް މިއީ ބިންވެރިޔާ ސްކީމުގެ ދަށުން ހަވާލުކޮށްފައިވާ ގޯތި ނޫންކަން އެޗްޑީސީއަށް ސާފުވާކަން އާންމުވެފައިވާ ލިޔެކިޔުމުން އެނގޭކަމަށް ދަ ޑިމޮކްރެޓްސްގެ ނޫސް ބަޔާނުގައިވެއެވެ. އެހެން ނަމަވެސް އިންފާރު ރާނަން އެޗްޑީސީއިން ހުއްދަދީ، ވަގު ގޯތީގެ އިންފާރު ރާނާފައިވަނީ އެޗްޑީސީގެ އެނގުމާއި ފެނުމުގެ ތެރެއިންކަން ސާފުކޮށް އެނގޭކަމަށާއި މިބޮޑު ވައްކަމުގެ މައްސަލަ ފުލުހަށް ހުށަހަޅައި ތަހުގީގު ކުރުމަށް އެދުމުގެ ބަދަލުގައި އެ ކުންފުނިން އެ މައްސަލަ ސިއްރުކުރި ކަމީ މިއަދު ޖިނާއީ ތަހުގީގު ހިންގާންޖެހޭ ކަމެއްކަމަށްވެސް ޑިމޮކްރެޓްސްގެ ނޫސް ބަޔާނުގައިވެއެވެ.
ދަ ޑިމޮކްރެޓްސް އިން ބުނީ މި މައްސަލާގައި ޝާމިލުވަނީ ސީދާ ރައީސުލްޖުމްހޫރިއްޔާ ނަން ފޮނުއްވައިގެން އައްޔަނު ކުރައްވާފައިވާ މަގާމެއްގައި ހުންނެވި މޯލްޑިވްސް ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްއީ) ގެ ޑެޕިއުޓީ މެނޭޖިންގް ޑިރެކްޓަރާއި އޭނާގެ އެއްބަނޑު އެއްބަފާ ބޭބެ، އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދު ކަމުގައިވާކަމީ ނުހަނު ކަންބޮޑުވާ ކަމެއްކަމަށެވެ. އަދި މަގާމުގެ ބާރާއި އިހުތިޔާރުތައް އަމިއްލަ ޒާތީ އަދި ސިޔާސީ މަންފާއަށް ބޭނުންކުރުމުގައި ދެމިތިބޭން މި ސަރުކާރުން ފުރުސަތު ދެމުންދާކަމަށް ދަ ޑިމޮކްރެޓްްސް އިން ބުނެއެވެ.
އެ ބަޔާނުގައި ބުނީ ސަރުކާރުގެ ޒިންމާދާރު އިސް މަގާމުތަކަށް ސީދާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަންކުރައްފައިވާ ބޭބޭފުޅުންނާމެދު ތަކުރާރުކޮށް އާންމުކޮށް އިވި ފެންނަމުން މިދާ ކަންކަމުން ކޮރަޕްޝަނާއި ވައްކަމާއި ފަސާދައަކީ މިސަރުކާރުގެ ހިންގުމުގެ ވައްޓަފާޅިކަން މާބޮޑަށް ސާފުވަމުން އަންނަކަމަށެވެ.
ގާނޫނުއަސާސީއާއި ލާމަރުކަޒީ ގާނޫނުގައި ބަޔާންކުރާ ހަމައިން ހުޅުމާލޭގެ މުނިސިޕަލް ހިދުމަތްތައް މާލެ ސިޓީ ކައުންސިލަށް ބަދަލުކުރުމުގައި ސަރުކާރުން ފަހަތު ފަޔަށް ބުރަވެ، ލަސްކުރަމުންދަނީ މިބާވަތުގެ ކޮރަޕްޝަންގެ ޖަރީމާތަކަށް ކަންފަހިކުރާންކަމަށް ވެސް ޑިމޮކްރެޓްސްގެ ނޫސް ބަޔާނުގައިވެއެވެ.
