މިއަދު ޑިމޮކްރެޓްސް އިން ބޭއްްވި ނޫސްވެރިންގެ ބައްދަލުވުމުގައި ސައިފް ވިދާޅުވީ ކޮރަޕްޝަންގެ ވަގު ގޯތީގެ މަންޒަރުތަކާއި އަޑުތަކެއް އިވެންފެށާފައިވާކަމަށެވެ. އެހެންކަަމަށްވުމާއެކު ހުޅުމާލޭ، މާލޭ ސިޓީ ކައުންސިލާ ހަވާލުކުރުން ލަސްވަމުން ދަނީ ކޮރަޕްޝަންގެ ބާވަތުގެ އަމަލުތަކަށް ކަންފަހިކުރުމަށް ކަންް ދެންނެވިދާނެކަމަށްވެސް ސައިފް ވިދާޅުވިއެވެ.
ކަންބޮޑުވުން ފާޅުކޮށް ސައިފް އިތުރަށް ވަނީ ޑިމޮކރެޓިކް ކޮންޓްރޯލް ނެތި ރައްޔިތުންގެ މުހިއްމު ބިންތަކެއް، އެތައް މިލިއަން ރުފިޔާއެއް ރައްޔިތުންގެ ފައިސާއިން ހަރަދުކޮށްގެން ހިއްކާފައި ހުރި ބިންތަކެއް ބަހަމުން ދާއިރު އެޗްޑީސީއާ ހުޅުމާލޭ ހަވާލުކޮށްފައި އޮންނާތީ އެކަމާމެދު އެއްވެސް އެއްޗެއް ބުނެވޭކަށް ނެތް ކަމަށެވެ.
މީގެއިތުރުން އެޗްޑީސީގެ ބޯޑާ އެމްޑީ ސަސްޕެންޑް ކުރައްވާ ފައިވާ ވާހަކައާއި، ޕީޖީ ގެ ފަރާތުންވެސް އެކަން ތަހުގީގުކުރަން އަމުރުކުރައްވާފައިވާ ވާހަަކަ އާއި، ފުލުހުން އެތަނަށް ވަތް ވާހަކަ ބޭނުން ކޮށްގެން ގޯތިތައް ދިނުން ލަސްކޮށްގެން ނުވާނެކަަމށްވެސް ސައިފު ވިދާޅުވިއެވެ.
އެހެންކަމަށްވުމާއެކު ހުޅުމާލޭގެ ބިމުގެ މިނިވަަން އޮޑިޓެއް ހިންގަން ޖެހޭ ކަމަށާއި އެކަން ވާނީ، ޑިމޮކްރެޓުން ގަބޫލު ކުރާގޮތުގައި ސިޓީ ކައުންސިލްގެވެސް ބައިވެރިވުމާއެކު، ދެފުއް ފެންނަ ގޮތެއްގައި ކަމަށް އޭނާ ބުނެއެވެ. އެގޮތުން ހުޅުމާލޭގެ ބިންތަކަށް ހަދާފައި އޮތް ގޮތް ސާފުވާނެ ވަރުގެ ބިމުގެ އޮޑިޓެއް ހިންގުމަށް ގޮވާލާކަމަށްވެސް ސައިފް ވިދާޅުވިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަން އަހްމަދު ނާސިފް ފިޔަވައި ދެން ތިބި ހުރިހާ މެންބަރުންނާއި މެނޭޖިން ޑިރެކްޓަރު ފަޒުލް ރަޝީދު ސަސްޕެންޑް ކުރީ މިއަދުގެ ވަގުތެއްގައެވެ.
ޕީސީބީން މިއަދު ބުނި ގޮތުގައި އެޗްޑީސީގެ ޗެއާމަން ފިޔަވައި ބޯޑުގައި ތިބި އެންމެންވަނީ ސަސްޕެންޑް ކުރީ ފުލުހުން ބަލަމުންދާ ހުޅުމާލޭން ގޯތި ދިން މައްސަލައާ ގުޅިގެން ކަމަށެވެ.
ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް އެޗްޑީސީން ގޯތިތަކެއް ދީފައިވާ ކަމަށް ބެލެވޭ މައްސަލައެއް ފެންމަތިވުމުން އެ މައްސަލައިގެ ޖިނާއީ ތަހުގީގެއް ފުލުހުން މިހާރު ވަނީ ފަށާފަ އެވެ. އުސޫލާ ހިލާފަށް ގޯތި ދިންކަން ހާމަވީ އެގޮތަށް ދޫކުރި ގޯތިތަކެއްގެ އިންފާރު ރޭނުމުގެ ހުއްދައަށް ހައުސިން މިނިސްޓްރީގައި އެޗްޑީސީން އެދުމުން، އެ މީހުންނަކީ ބިންވެރިޔާ ސްކީމްގެ ދަށުން ގޯތި ހޯދަން އެދުނު ބައެއް ނޫންކަން ހައުސިން މިނިސްޓްރީން އެންގުމުންނެވެ. އެކަމާ ގުޅޭ ލިޔުންތައް ވަނީ އާންމުވެފަ އެވެ.
