އިހައްދުވަހު ހިނގި މި ހާދިސާގެ ވީޑިއޯ ސޯޝަލް މީޑިއާގައި ފެތުރުމާ ގުޅިގެން ފުލުހުން ކުރި ތަހުގީގަކަށް ވިލިމާލޭ، ފިޔަބަރި، ހަސަން އިސާމް (30 އ) ކިޔާ މީހަކު ހައްޔަރުކޮށް އޭނާ ދުއްވި ސައިކަލުވެސްވަނީ ޓޯކޮށްފަ އެވެ.
އާއްމުވެފައިވާ ވީޑިއޯގައި ފެންނަ ގޮތުން، މޫނު ނުފެންނަ ގޮތަށް ހެލްމެޓް އަޅައިގެން ހުރި އެ މީހާ ވަނީ އަންހެން މީހާގެ ކަރުގައި އޮތް ފަށް ޖަހައިގަތުމަށް ފަހު، ސައިކަލު ހަރު ޖައްސައި، އަނެއްކާ ވެސް އަންހެން ކުއްޖާއާ ދިމާލަށް ގޮސް އެ ކުއްޖާގެ އަތް ދަބަސް ފޭރިގަންނަން މަސައްކަތްކޮށްފަ އެވެ. ނަމަވެސް އެ ސަރަހައްދަށް މީހުން އައުމާ ގުޅިގެން އޭނާ ވަނީ ފިލައިގެން ގޮސްފަ އެވެ.
ކްރިމިނަލް ކޯޓުގެ ރެކޯޑްތަކުން ދައްކާ ގޮތުން، އަންހެން ކުއްޖާއަތުން ފޭރެން މަސައްކަތް ކުރި އިސާމްއަކީ، ކުރިންވެސް ސައިކަލެއްގައި މަގުމަތިން ދިޔަ އަންހެނެއްގެ އަތުން ފޭރުމުގެ މައްސަލައެއްގައި ހުކުމެއް އިއްވާފައިވާ މީހެކެވެ. އެ ފަހަރު އިސާމް އަދި އެހެން މީހަކާ ދެ މީހުން ވެގެން ސައިކަލެއްގައި ދިޔަ އަންހެން ކުއްޖެއްގެ ވޮލެޓް ފޭރިގަތީ ކަލާފާނު ސްކޫލު ކައިރިން އަންހެން ކުއްޖާ ދުއްވި ސައިކަލުގައި އެހެން ސައިކަލަކުން ޖައްސައިގެންނެވެ.
އެ މައްސަލައިގައި އިސާމްއާއި އެހެން މީހެއްގެ މައްޗަށް ޖިނާއީ ހުކުމެއް އިއްވިއެވެ. އެހެންކަމުން، މި ފަހަރު މިއީ މި ގޮތަށް މަގުމަތިން ސައިކަލުގައި ދާ އަންހެން ކުދިން އަތުން ފޭރެން އިސާމް މަސައްކަތް ކުރި ފުރަތަމަ ފަހަރެއް ނޫނެވެ.
