ޖަރުމަނުގެ ލީގު ޗެމްޕިއަނުންނާ ޖަރުމަން ކަޕުގެ ޗެމްޕިއަނުން ވާދަކުރާ ސުޕާ ކަޕް، ދެން ކުޅޭނީ ފްރޭންކް ބެކެންބާއު ސުޕާ ކަޕުގެ ނަމުގައެވެ.
ޖަރުމަނުގެ ފުޓްބޯޅަ ޝައހުސިއްޔަތު ފްރޭންކް ބެކެންބާއުވަނީ މި އަހަރުގެ ކުރީކޮޅު މަރުވެފައެވެ. އުމުރުން 78 އަހަރުގައި މަރުވި ޖަރުމަނު ދުށް އެންމެ މޮޅު އެއް ކުޅުންތެރިޔާ އަކީ ފުޓްބޯޅައިގެ ދުނިޔޭގައި އިހުތިރާމާއި ލޯބި ހޯދާފައިވާ ޝަހުސިއްޔަތެކެވެ.
އޭނާ އަކީ ވެސްޓް ޖަރމަނީއާއެކު 1974 ވަނަ އަހަރު ވަރލްޑްކަޕް އުފުލާލި ޑިފެންޑަރެކެވެ. އޭގެފަހުން ކޯޗެއްގެ ގޮތުގައި 1990 ވަނަ އަހަރު ވަރލްޑް ކަޕް ހޯދިއެވެ. 1966 ވަނަ އަހަރުގެ ވަރލްޑްކަޕްގައި 4 ގޯލް ޖެހިއެވެ. އޭރު އޭނާއަށް އެންމެ 20 އަހަރެވެ. އެމުބާރާތުގެ އެންމެ މޮޅު ޒުވާން ކުޅުންތެރިއަކީ ވެސް ބެކެންބާއު އެވެ.
1972 ވަނަ އަހަރު ޔޫރަޕިއަން ޗެމްޕިއަންޝިޕް ވެސް އުފުލާލި ބެކެންބާއު ވަނީ ދެ ފަހަރު ބެލޮންޑިއޯ އެވޯޑްވެސް ހޯދާފައެވެ.
