ފަސް އަހަރުތެރޭ ސްޓެލްކޯ އިން 500،000 ގަސް އިންދުމަށް ނިންމާ ކުރަމުންދާ މަސައްކަތުގެ ތެރެއިން މި އަހަރުގެ ޖޫން މަހުގެ 5 ވަނަ ދުވަހުން ފެށިގެން މި ޑިސެންބަރު މަހުގެ 21 ވަނަ ދުވަހުގެ ނިޔަލަށް ސްޓެލްކޯއިން ހިދުމަތްދޭ ރަށްރަށުގައި މިހާތަނަށް 52،334 އަށްވުރެއް ގިނަ ގަސް އިންދާފައިވާކަމަށް އެ ކުންފުނިން މިއަދު ބުންޏެވެ.
ރައީސް މުއިއްޒު ފައްޓަވައިދެއްވާފައިވާ "5 އަހަރުން 5 މިލިއަން ގަސް" ޕްރޮގްރާމުގައި ބައިވެރިވުމުގެ ގޮތުން ސްޓެލްކޯއިން އަންނަނީ 5 އަހަރުތެރޭގައި 5 ލައްކަ ގަސް އިންދުމުގެ ހަރަކާތެއް ކުރިއަށް ގެންދަމުންނެވެ.
ސްޓެލްކޯގެ މުވައްޒަފުންނަށް ޝުކުރު އަދާކުރައްވަމުން ކުރެއްވި ޕޯސްޓެއްގައި އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ ވަނީ މި ހަރަކާތުގެ ތެރެއިން ސްޓެލްކޯއިން މަހެއްގެ މައްޗަށް އެވެރެޖްކޮށް 8،340 ގަސް އިންދާކަމަށް ފާހަގކޮށްފަ އެވެ.
ފަހްމީ ވަނީ ރައީސް ޑރ. މުއިއްޒުގެ ތަސައްވަރު ބޮޑު ލީޑަޝިޕަށް ޝުކުރު އަދާކުރައްވާފަ އެވެ.
މުވައްޒަފުންގެ ހިދުމަތްތެރިކަމަށް ތައުރީފުކުރައްވަމުން ފަހުމީ އެ ޕޯސްޓްގައި ވަނީ ކުރިއެރުމަށް ހުރަސްއެޅޭ ގޮތަށް ބައިބައިވުންތަކަށް ފުރުސަތު ދިނުމުގެ ބަދަލުގައި، ގައުމުގެ ހެޔޮކަމަށްޓަކައި އެންމެން ގުޅިގެން މަސައްކަތް ކުރުމަށް އިލްތިމާސް ކުރައްވާފަ އެވެ.
ރައީސް ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު 5 މިލިއަން ގަސް އިންދުމުގެ މަޝްރޫއު އިފްތިތާހު ކުރީ މިދިޔަ ޖޫން މަހުގަ އެވެ.
ރާއްޖެ ފެހިކުރުމަށާއި ގަސްތަކުގެ މާހައުލީ ނިޒާމްތައް ރައްކާތެރިކޮށް ދެމެހެއްޓުމާއި މޫސުމީ ބަދަލުން ދިމާވާ ނުރައްކާތަކަށް ރާއްޖޭގެ ވިލުންތެރިކަން އިތުރުކުރުމަށްޓަކައި ފަސް އަހަރުގެ ތެރޭގައި، ފަސް މިލިއަން ގަސް ރާއްޖޭގެ އެކިކަންކޮޅުތަކުގައި އިންދުމުގެ މަޝްރޫއެއް ކުރިއަށް ގެންދިއުމަކީ ރައީސްގެ ރިޔާސީ ވައުދެކެވެ.
