އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ.
އަންނަ އަހަރު ތެރޭގައި އައު ޓާމިނަލުގެ މަސައްކަތް ނިންމައި ހުޅުވުމަށް ސަރުކާރުން އަމާޒު ހިފާފައިވާއިރު، އެ ޓާމިނަލުގެ މަސައްކަތް އަވަސްކުރުމަށް މީގެ ކުރިންވެސް އިތުރު ދެ ލޯނެއް ސަރުކާރުން ނެގި އެވެ. އެގޮތުން އަބޫދާބީ ފަންޑުން 50 މިލިއަން ޑޮލަރު އަދި ސައުދީ ފަންޑުން 180 މިލިއަން ޑޮލަރުގެ ލޯނެއް ނަގާފައިވެ އެވެ.
އާ ލޯނުގެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވި ފިނޭންސް މިނިސްޓަރު މޫސާ ޒަމީރު ވިދާޅުވެފައިވަނީ ވީއައިއޭ ތަރައްގީކުރުމުގެ މަޝްރޫއަކީ ރާއްޖޭގެ ގައުމީ ތަރައްގީގެ އަމާޒުތައް ހާސިލުކުރުމަށް މަގުފަހިވާނެ އަދި ޓޫރިޒަމް ސިނާއަތުން ލިބޭ އާމްދަނީ އިތުރުވާނެ މަޝްރޫއެއް ކަމަށެވެ.
އަދި ރާއްޖޭގެ ތަރައްގީގެ ކަންކަމުގައި އެކުވެރި އަރަބި އިމާރާތުން ފޯރުކޮށްދޭ އެހީތެރިކަން ފާހަގަކުރައްވަައި ޒަމީރުވަނީ އެ ގައުމަށް އަދި ހާއްސަކޮށް އަބޫދާބީ ފަންޑަށް ޝުކުރު އަދާކުރައްވާފަ އެވެ.
ވެލާނާ އެއާޕޯޓު މަޝްރޫއާ އެކު، ގައުމީ ތަރައްގީގެ ލަނޑުދަނޑިތައް ހާސިލުކުރަން މަގުފަހިވެ، ޓޫރިޒަމުން ލިބޭ އާމްދަނީ އެތައް ގުނައެއް އިތުރުވެ، ރާއްޖޭގައި ޗުއްޓީ ހޭދަކުރާ ޓޫރިސްޓުން ޒަމާނީ ފެންވަރުގެ ހިދުމަތެއް ދެވޭނެ ކަމަށް ޒަމީރު ވިދާޅުވި އެވެ.
އާ ޓާމިނަލް އެއްކޮށް ބޭނުން ކުރަން ފެށުމުން ގާތްގަނޑަކަށް 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ.
އާ ޓާމިނަލްއާ އެކު، އެއާޕޯޓަށް 1،800 މުވައްޒަފުން އިތުރުވާނެ އެވެ. ގާތްގަނޑަކަށް 30 އަށް ވުރެ ގިނަ އެއާލައިނުން ހިދުމަތް ދޭ އިރު އާ ޓާމިނަލްއާ އެކު، އިތުުރު އެއާލައިންތަކަށް ވެސް ފުރުސަތުތައް ދެވޭނެ އެވެ.
