ހޮސްޕިޓަލްތަކަށް، ހެލްތު މިނިސްޓަރު އަބްދުﷲ ނާޒިމް އިބްރާހިމް ފޮނުއްވި ލިޔުމެެއްގައި ވަނީ ރާއްޖޭގައި ނަފްސާނީ ބަލިމަޑުކަން ކަންބޮޑުވާވަރަށް އިތުރުވާކަމަށް ފާހަގަކޮށްފަ އެވެ. ނަފްސާނީ ބަލި އިތުރުވަމުންދާ ވަރަކަށް އެ ބަލި ތަހައްމަލްލުރާ މީހުންނާއި، އަމިއްލައަށް މަރުވާ މީހުންނާއި، ނުކުޅެދުންތެރިކަންވެސް އިތުރުވަމުންދާ ކަމަށް ނާޒިމް ވިދާޅުވި އެވެ.
ހުރިހާ އަތޮޅެއްގެ ހޮސްޕިޓަލްތަކުން ނަފްސާނީ ބަލިތަކަށް ފަރުވާދީ އެހީތެރިކަން ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ކަަމަށް ފާހަގަކޮށް ނާޒިމް ވިދާޅުވީ އެފަދަ މީހުންނަށް ފަރުވާ ދޭން ހަމައެކަނި މިވަގުތު ހުރީ މާލެ އާއި ލެވެލް 3 ނުވަތަ ބައެއް ރީޖަަނަލް ހޮސްޕިޓަލްތައް ކަަމަށެވެ.
އެހެންވެ، ގައުމީ ފެންވަރުގައި ސިއްހީ ނިޒާމުގެ ތެރެއިން ނަފްސާނީ ބަލިތަކަށް ފަރުވާ އަދި އެހީތެރިކަން ދެވޭ މިންވަރު އިތުރުކޮށް، ހިދުމަތް ޖޯދާ މީހުންގެ ވެއިޓްލިސްޓުގައި މަޑުކުރަންޖެހޭ މުއްދަތު ކުޑަކުރުމާއި ސައިކޮލޮޖިސްޓުންނާއި ސައިކޭޓްރިސްޓުންނާއި ކައުންސެލަރުންނާއި ތެރަޕިސްޓުން އަދި ސޯޝަލް ވޯކަރުންގެ އެހީތެރިކަން ހޯދަން ފަސޭހަ ގޮތެއް ގާއިމްކޮށް، ލެވެލް 2 ގެ ހޮސްޕިޓަލްތަކުގައި އެ ހިދުމަތް ފަށަން ނިންމީ ކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ ތެރަޕީއާއި ކައުންސިލް ހިދުމަތްތައް ސެންޓްރަލައިޒް ވެފައިހުންނަނީ މާލެ ސަރަހަށްދަށް އެކަނި ކަމަށެވެ. އެހެންކަމަށްވުމާއެކު ހިދުމަތް ހޯދަން ބޭނުންވާ މީހުންގެ ވެއިޓްލިސްޓް ދިގުވެ، އަތޮޅުތަކުން މާލެ އައިސްގެން ނޫނީ އެފަދަ ހިދުމަތްތައް ލިބެން ނެތުމާއެކު ގިނަ ގޮންޖެހުންތަކާ އާއްމުން ކުރިމަތިލާން ޖެހިފައިވާކަމަށެވެ.
ސަރުކާރުގެ ހަފްތާ 14 މަގު ޗާޓުގެ ދަށުން ނަފްސާނީ ސިއްހަތުގެ ހެލްޕްލައިން ނަންބަރެއްގެ ގޮތުގައި 1677 ވަނީ ހަަމަޖައްސާފަ އެވެ. އަދި އެ ހެލްޕްލައިން ނަންބަރުން ކޮންމެ ގަޑިއެއްގައިވެސް ހިދުމަތް ލިބެއެވެ.
