މޫކޭ ފިލައިގެން ގޮސްފާނެ ކަމަށް ތުހުމަތު ކުރާ ކަމަށް ބެލެވެނީ، ދިގު މުއްދަތަކަށް ރާއްޖޭން ބޭރުގައި ދިރިއުޅެވޭނެ ވަރުގެ ތަނަވަސްކަން ރޯޑް މޫކޭގެ ކިބައިގައި އެބަހުރި ކަމަށް ފުލުހުންގެ އިންޓެލް ރިޕޯޓެއްގައި އޮތް ކަމަށް ރިޕޯޓްތައް ލިބުމުންނެވެ.
މޫކޭގެ ޕާސްޕޯޓް އޮތީ ކޯޓު އަމުރަކަށް ހިފަހައްޓާފަ އެވެ. ޕާސްޕޯޓް ހިފަހައްޓަން ކްރިމިނަލް ކޯޓުން ނެރެފައިވާ އަމުރުގައި ބުނެފައިވަނީ އޭނާއަކީ ދިގު މުއްދަތަކަށް ރާއްޖޭން ބޭރުގައި ދިރިއުޅުމުގެ މާލީ ތަނަވަސްކަން ހުރި މީހެއް ކަމަށާއި އެހެންވެ އޭނާ ފުރައިގެން ގޮސްފިނަމަ، ތަހުގީގަށް ހެކި ހޯދަން ހުރަސް އެޅޭނެ ކަމަށް ފުލުހުން ބުނާ ކަމަށެވެ.
އާރުޑީސީގެ ހިޔާނާތުގެ މައްސަލަ ޕޮލިހަށް ހުށަހެޅީ 2022 ވަނަ އަހަރުގެ ސެޕްޓެމްބަރު، މަހުގައި އެވެ. އެ މައްސަލައާ ގުޅިގެން ފުލުހުން ބުނެފައި ވަނީ އާރުޑީސީގެ އެކައުންޓުން ތިން މީހެއްގެ އެކައުންޓަށް 14 މިލިއަން ރުފިޔާ ފޮނުވާފާއިވާ ކަމަށެވެ.
މި މައްސަލައިގައި ހެކި ހޯދަން ފުލުހުން އާރުޑީސީ އަށް ވަނީ ރިޔާސީ އިންތިހާބަށް ފަހު، 14 ނޮވެމްބަރު 2023، ގަ އެވެ.
މޫކޭ ނިސްބަތްވާ އިދިކޮޅު އެމްޑީޕީން ފުލުހުންގެ މި މަސައްކަތްތައް ސިފަކުރަނީ އިދިކޮޅު ފަރާތްތަކަށް ބިރުދައްކާ، މި ފަހުން ފެންމަތިވި ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ހިޔާނާތް އޮއްބާލަން ކުރާ ކަމެއްގެ ގޮތުގަ އެވެ.
އާރުޑީސީގެ މައްސަލައާ ގުޅިގެން މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ފައްޔާޒް އިސްމާއިލްއާ ފުލުހުން ސުވާލުކޮށްފައިވެ އެވެ. ނަމަވެސް އޭނާގެ މައްޗަށް ޖިނާއީ ކުށެއްގެ ތުހުމަތެއް ކުރާ ކަމަކަށް ފުލުހުން އަދި ނުބުނެ އެވެ.
ކުރީގެ ސަރުކާރުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ވަރަށް ބޮޑެތި ބޭކާރު ހަރަދުތަކެއްކޮށް، ކުންފުނި އޮތީ 837 މިލިއަން ރުފިޔާ އިން ދަރާފައި ކަމަށް މި ސަރުކާރުން އެ ކުންފުނި ހަވާލުކުރި މެނޭޖިން ޑިރެކްޓަރު ވަނީ ވިދާޅުވެފަ އެވެ. ސިޔާސީ ވަޒީފާތަކުގައި ކުރިން ގިނަ ބަޔަކު އުޅުނު ކުންފުނީގެ ދަރަނި ބޮޑުވި ސަބަބުތަކުގެ ތެރޭގައި އެކި މަޝްރޫއުތަކަށް ބޭނުންވާ އުޅަނދުތައް މާކެޓް ރޭޓަށް ވުރެ ބޮޑުކޮށް އަމިއްލަ ކުންފުނިތަކަކުން ކުއްޔަށް ނަގައިގެން ބޭނުންކުރުން ހިމެނެ އެވެ.
