ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލުން ބުނީ ކްރިސްމަސް އާއި އާ އަހަރާ ދިމާކޮށް ކޮންމެ އަހަރަކު ވެސް ދުނިޔޭގެ މަހުޖަނުންގެ ޕްރައިވެޓު ޖެޓުތަކުން ވެލާނާ އެއާޕޯޓު ފުރާލާއިރު، މި ވަގުތު ވެސް 30 އަށް ވުރެ ގިނަ ޖެޓު އެ އެއާޕޯޓުގައި ޕާކުކޮށްފައި އެބައޮތް ކަމަށެވެ.
އަދި ޖެޓް މޫވްމަންޓުތައް ވެސް މި އަހަރު އިތުރުވިއިރު، މި މަސް ފެށިގެން، އިއްޔެގެ ނިޔަލަށް 148 ޖެޓް މޫވްމަންޓްސް ރެކޯޑުކުރެވިފައިވާ ކަމަށް އެ ކުންފުނިން ބުންޏެވެ.
މިއީ މިދިޔަ އަހަރުގެ ޑިސެމްބަރު މަހުގެ 28ވަނަ ދުވަހުގެ ނިޔަލަށް ރެކޯޑުކުރެވުނު 137 މޫވްމަންޓާ އަޅައިކިޔާއިރު، 11 މޫވްމަންޓު އިތުރުވުމެކެވެ. އެެހެންކަމުން މި އަހަރުގެ އަދަދަކީ 8 ޕަސެންޓުގެ އިތުރުވުމެއް ކަމަށް އެ ކުންފުނިން ބުންޏެވެ.
މުޅި އަހަރުގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް 2،326 ޖެޓު މޫވްމަންޓްސް ރިކޯޑްކުރެވިފައިވެ އެވެ. މިދިޔަ އަހަރުގެ ޑިސެމްބަރު މަހުގެ 28 ވަނަ ދުވަހުގެ ނިޔަލަށް ރިކޯޑްކުރެވިފައި ވަނީ 2،107 ޖެޓު މޫވްމަންޓްސް އެވެ.
މީގެ އިތުރުން މިދިޔަ އަހަރާ ބަލާއިރު، ވެލާނާ އިންޓަނޭޝަނަލް އެއާޕޯޓަށް އައި ފަސިންޖަރުންގެ އަދަދު ވެސް ނުވަ ޕަސެންޓަށް ވަނީ އިތުރު ވެފައި ކަމަށް އެމްއޭސީއެލުން ބުންޏެވެ.
މިދިޔަ އަހަރު ރާއްޖެ އަށް 2.2 މިލިއަން ފަސިންޖަރުން އައިސްފައިވާއިރު އިއްޔެގެ ނިޔަލަށް އެ އަދަދު އުޅެނީ 2.4 މިލިއަންގައި ކަމަށް ބުންޏެވެ. އަދި އަންނަ އަހަރު ރާއްޖެ އަންނަ ފަތުރުވެރިންގެ އަދަދު މިއަހަރަށްވުރެ 15 އިންސައްތަ އިތުރުކުރުމަށްވެސް ސަރުކާރުން ވަނީ އަމާޒު ކަނޑައަޅާފަ އެވެ.
