ލިވަޕޫލްގެ ފޯވާޑްގެ ކޮންޓްރެކްޓް ހަމަވާން ކައިރިވެފައިވާއިރު، ކޮންޓްރެކްޓް އިތުރު ކުރަން އެއްވެސް މަސައްކަތެއް ކޮޅެއްގައި ޖެހޭތަނެއް ނުފެނެއެވެ. ދޭތެރެއަކުން ސަލާހް، ލިވަޕޫލްގެ ކޮންޓްރެކްޓް އާކޮށްފާނެހެންވެސް ހީވިއެވެ. އެހެންނަމަވެސް މިހާރު އަނެއްކާވެސް އަޑުތައް އިވެނީ ލިވަޕޫލްގެ ކޮންޓްރެކްޓް އާކުރުމުގެ ފުރުސަތު ހަނި ކަމަށެވެ.
ރިޕޯޓްތައް ބުނާ ގޮތުގައި ސަލާހްގެ ހުވަފެނަކީ ސައުދީއަށް ބަދަލުވުމެވެ. ރިޕޯޓްތައް ބުނާ ގޮތުން ސައުދީ އަރަބިއްޔާގެ ޗެމްޕިއަން އަލް ހިލާލް ބޭނުންވަނީ އަންނަ ހޫނު މޫސުމުގެ ކްލަބް ވޯލްޑް ކަޕުގެ ކުރިން، ލިވަޕޫލްގެ ތަރި މުހައްމަދު ސަލާހް އެ ކްލަބަށް ގެނައުމަށެވެ.
އުމުރުން 31 އަހަރުގެ ސަލާހުގެ ކޮންޓްރެކްޓް މި ސީޒަން ނިމޭއިރު ނިމުމަކަށް އަންނައިރު، ކޮންމެ އަގެއްގައި ނަމަވެސް އޭނާ ގެންދަން އަލް ހިލާލުން ބޭނުންވާ ކަމަށް ރިޕޯޓްތައް ބުނެއެވެ.
ސަލާހަށް ސައުދީ ލީގުގެ ކަޅި އަމާޒުވެފައިވާއިރު، ސައުދީ ލީގުގެ އަލް އިއްތިހާދުން މީގެ ކުރިން ހުށަހެޅި 150 މިލިއަން ޕައުންޑްގެ ބިޑެއް ލިވަޕޫލުންވަނީ ރިޖެކްޓްކޮށްފައެވެ. އެކަމަކު މި ސީޒަންގެ ނިޔަލަށް ސަލާހްގެ ކޮންޓްރެކްޓް ހަމަވާތީ، ކްލަބަށް މިހާރުދެން އެކަމުގައި ކުރެވޭނެ މާބޮޑު ކަމެއްނެތެވެ. އާ ކޮންޓްރެކްޓެއްގައި ސޮއިކުރަން ސަލާހް ބޭނުންނުވާ ކަމަށް ރިޕޯޓްތައް ބުނެއެވެ.
