ކޮންސްޓްރަކްޝަން މިނިސްޓްރީން މިކަން އިއުލާނުކުރީ ހޯމަ ދުވަހުއެވެ. އެ މިނިސްޓްރީން ބުނީ ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީގެ ހިދުމަތްތައް މިހާރު ދެމުން ގެންދަނީ ދަރުބާރުގޭގައި ކަމަށެވެ.
އަމީނީ މަގުގައި ހުންނަ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގެ އިމާރާތް އަލިފާނުގެ ހާދިސާގައި އަނދައި، ބޭނުން ނުކުރެވޭ ވަރަށް ހަލާކުވެފައިވެއެވެ. އަދި އެންވަޔަރަމަންޓް މިނިސްޓްރީ ހިންގަމުންދިޔަ ގްރީން ބިލްޑިންގަށްވެސް އަލިފާނުގެ ސަބަބުން ގެއްލުން ލިބިފައިވެއެވެ.
ދަރުބާރުގެއަކީ ރާއްޖޭގެ ތާރީހީ އިމާރާތެއް ކަމާއެކު، އެތަނުގައި ގިނަ އަދަދެއްގެ ބޮޑެތި އިވެންޓްތަކާއި ކައިވެނީގެ ހަފްލާތައް ބާއްވަމުން އައި ތަނެކެވެ. ނަމަވެސް މިހާރު އެތަނުގައި ތިން މިނިސްޓްރީއެއްގެ މަސައްކަތް ހިންގަން ޖެހުމާ ގުޅިގެން، އާންމު ފަރާތްތަކަށް ކުއްޔަށް ދޫކުރުން ވަނީ ވަގުތީގޮތުން މެދުކަނޑާލާފައެވެ.
