ރާއްޖޭގެ އުތުރުގެ ރަށެއްގައި ހިނގި މި ހާދިސާއަކީ، ބިދޭސީއަކު އޭނާގެ ފޯނުން ދިވެއްސެއްގެ މޫނަށް އަލިކުރުމުން ފޯނު އަތުލި މީހެއްގެ މައްސަލައެވެ. މި މައްސަލައިގައި ދައުލަތުން އެ މީހާގެ މައްޗަށް ކުރީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
މިއީ، 2019 ވަނަ އަހަރު ހިނގި ހާދިސާއެއް ނަމަވެސް، މި މައްސަލައިގެ ހުކުމް އިއްވާފައިވަނީ މިދިޔަ ޑިސެމްބަރު މަހުއެވެ. މި މައްސަލައިގެ ޝަރީއަތުގައި ދައުވާ ލިބުނު ދިވެހި މީހާވަނީ ކުށަށް އިއުތިރާފުވެ، ވީހާވެސް ލުއި އަދަބެއް ދިނުމަށް އެދިފައެވެ.
ދައުވާ ލިބުނު މީހާ ކުށަށް އިއުތިރާފުވެފައިވާތީ އަވަސް ނިޔާގެ މައްސަލައެއްގެ ގޮތުގައި ކުރިއަށް ގެންދިޔަ މި މައްސަލައިގައި ޝަރީއަތުން އިއްވި ހުކުމަކީ ތިން މަހާއި 18 ދުވަހަށް ޖަލަށް ލުމަށެވެ. އެހެންނަމަވެސް، އެ މައްސަލައާއި ގުޅިގެން ކުރިން އޭނާ ބަންދުކޮށްފައި ހުރި މުއްދަތު އުނިކުރުމަށް ފަހު، ދެން ތަންފީޒު ކުރަން ޖެހޭ ހުކުމަކީ، ތިން މަހާއި ދެ ދުވަހުގެ ޖަލު ހުކުމެވެ.
