އަންނަ ފެބްރުއަރީ މަހުގެ 14 ވަނަ ދުވަހު، ޗެރިޓީ ޝީލްޑް މެޗުން އާ ސީޒަން ފަށަން ތައްޔާރުކޮށްފައިވާ މި އަހަރުގެ ފުޓްބޯޅަ ކަލަންޑަރުގައި އަތޮޅުތެރޭ ފުޓްބޯޅައަށް އެއްވެސް މުބާރާތެއް ނެތްއިރު، މި ފަހުން ނިމުނު ގޯލްޑްކަޕަކީ މި ފަހުގެ ތާރީހެއްގައި ބޭއްވުނު އެންމެ ފޯރިގަދަ ފުޓްބޯޅަ މުބާރާތެވެ.
ޖުމްލަ 17 ޓީމުން ކުޅުނު ގޯލްޑްކަޕުގައި ތަމްސީލް ކުރީ މާލޭ ސިޓީ، އައްޑޫ ސިޓީ އަދި ފުވައްމުލަކު ސިޓީ ހިމެނޭހެން ޖުމްލަ 17 ރަށުގެ ޓީމުތަކެވެ.
އެފްއޭއެމުން ކްލަބުތަކަށް ފޮނުވާފައިވާ ކަލަންޑަރުގައި އޮތީ މުޅިންވެސް މާލެ ބޭސްޑް ކްލަބުތަކުގެ ފުޓްބޯޅައެވެ. ދެވަނަ ޑިވިޝަނާ، ތިންވަނަ ޑިވިޝަންވެސް އެއީ މައިގަނޑު ގޮތެއްގައި މާލޭ ބޭސްޑް ކްލަބުތަކުގެ މުބާރާތެކެވެ.
ކަލަންޑަރުގައި ދެން އޮތީ، ޕްރެޒިޑެންޓްސް ކަޕާ، އެފްއޭކަޕް އަދި ދިވެހި ލީގެވެ. މީގެ އިތުރުން ގްރާސްރޫޓް ފެސްޓިވަލްތަކާއި އެކި އުމުރުފުރާތަކުގެ ގައުމީ ޓީމުގެ މުބާރާތްތައް ކަލަންޑަރުގައި ހިމަނާފައިވާއިރު އަންހެން މުބާރާތެއް އަދި އަތޮޅު މުބާރާތެއް ނެތެވެ.
ފުޓުބޯޅަ ލާމަރުކަޒު ކުރުމުގެ ސިޔާސަތަކީ އެފްއޭއެމްގެ ސްޓެޓިއުޓްސް (އަސާސީ ގަވާއިދު) ގެ 10 އާއި 18 ވަނަ މާއްދާއއާއި 22 ވަނަ މާއްދާއިން ކަށަވަރުކޮށްދީފައިވާ ސިޔާސަތަކަށް ވީނަމަވެސް، ވެއަތުވެދިޔަ އަހަރުތަކުގައި މިސިޔާސަތަށް އަމަލު ކޮށްފައެއް ނުވާކަމުގެ ކަންބޮޑުވުން ގިނަ ބަޔަކު ފާޅުކުރެއެވެ.
