މި އަހަރުގެ ގޯލްޑަން ފުޓްސަލް ޗެލެންޖުގައި ރާއްޖޭގެ އެކި ހިސާބުތަކުން 129 ޓީމެއް ބައިވެރިވާއިރު ޖުމުލަ 320 މެޗު ކުޅެން ވަނީ ހަމަޖެހިފަ އެވެ. ރޭ ފެށުނު މި މުބާރާތް އަންނަ މަހުގެ 25 ވަނަ ދުވަހާ ހަމައަށް ކުރިއަށްދާނެ އެވެ. މުބާރާތުގެ މެޗުތައް ކުޅޭނީ ހުޅުމާލޭގަ އެވެ.
ގޯލްޑަން ފުޓްސަލް ޗެލެންޖަކީ 2015 ވަނަ އަހަރުން ފެށިގެން ކޮންމެ އަހަރު ވެސް ބާއްވަމުން އަންނަ ވަރަށް ފޯރިގަދަ ފުޓްސަލް މުބާރާތެކެވެ. މިއީ އުރީދޫ މޯލްޑިވްސްއިން މި މުބާރާތުގެ ޕްލެޓިނަމް ޕާޓްނަރެއްގެ ގޮތުގައި ބައިވެރިވާ ތިންވަނަ ފަހަރެވެ. އުރީދޫން ބުނީ، މި އަހަރު ވެސް ގޯލްޑަންގެ މެޗުތައް ބަލަންދާ ސަޕޯޓަރުންނާއި ޓީމުތަކަށް ޚާއްސަ ހަރަކާތްތަކެއް ރާވާފައިވާ ކަމަށެވެ.
މިދިޔަ އަހަރުގެ ގޯލްޑަން ފުޓްސަލް ޗެލެންޖްގެ ޗެމްޕިއަން، ބ. އޭދަފުށި 1-0 އިން ބަލިކޮށް، ލ. ގަމުންވަނީ ރޭ ކުޅުނު ގޯލްޑަން ޗެރިޓީ ޝީލްޑް ދިފާއުކޮށްފަ އެވެ.
