ރައީސް މިހެން ވިދާޅުވީ ރާއްޖޭގެ ހުރިހާ އަތޮޅަކަށް ޒިޔާރަތްކުރައްވައި އަތޮޅުތަކާއި ރަށްރަށާއި ސިޓީތަކުގެ ކައުންސިލްތަކާ ބައްދަލުކުރައްވަން ރައީސް ފައްޓަވާފައިވާ ސިލްސިލާ ދަތުރުފުޅުގައި ކ. ގުޅިއަށް މިއަދު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރަސްމާލެ މަޝްރޫއަކީ ރާއްޖެއަށް ދިމާވެފައިވާ ގެދޮރުވެރިކަމުގެ މައްސަލައަށް ނުވަތަ ބޯހިޔާވަހިކަމުގެ މައްސަލައަށް އެއް ސަރަހައްދަކުން އެންމެ ބޮޑު ހައްލު އަންނާނެ މަޝްރޫއު ކަމަށެވެ.
މިދިޔަ އަހަރު ބޭނުންވި ސްޕީޑުގައި ރަސްމާލެ މަޝްރޫއު ކުރިއަށް ނުގެންދެވުނީ ބައިވަރު މައްސަލަތައް ދިމާވެގެންކަން ފާހަގަކުރައްވާ ރައީސް މުއިއްޒު ވިދާޅުވީ އެ ހުރިހާ ދަތިތަކުން އަރައިގަނެ މިހާރު އެ މަސައްކަތް ފެށޭ ހިސާބަށް ގޮސްފައިވާ ކަމަށެވެ.
ރަސްމާލެ ހިއްކުމުގެ މަޝްރޫއު އަލުން ފެށިކަން އެޗްޑީސީން މިދިޔަ ނޮވެމްބަރުގައި އިއުލާންކުރި ނަމަވެސް، އެކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ.
ރަސްމާކެ މަޝްރޫޢުގައި 1،153 ހެކްޓަރުގެ ބިން ހިއްކުމަށް ހަމަޖެހިފައިވެ އެވެ. ރައްޔިތުންނަށް އެކަށީގެންވާ ބޯހިޔާވަހިކަމެއް ފޯރުކޮށްދޭން އަމާޒުކޮށް ރަސްމާލޭގައި އެކަނި ވެސް އެކި ކަހަލަ 30،000 ހައުސިން ޔުނިޓް އަޅާނެ ކަމަށް ރައީސް މީގެ ކުރިން ވަނީ ވިދާޅުވެފަ އެވެ.
