މި ދުވަސްވަރަކީ އުމްރާއަށް ގޮސް އެނބުރި އަންނަ މީހުން ގިނަވާ ދުވަސްވަރަކަށް ވުމާއެކު، ބަލިތައް ފެތުރުމުގެ ފުރުސަތު ބޮޑުކަމަށް އެ އޭޖެންސީން ބުނެފިއެވެ.
އެޗްޕީއޭއިން ބުނީ ޗައިނާގައި މިހާރު ފެތުރެމުންދާ ބަލިތަކާ ގުޅިގެން އެ ގައުމުގެ ހާލަތު ގާތުން ބަލަމުން އަންނަ ކަމަށެވެ. އަދި އެއީ ކޮންމެ އަހަރެއްގެ ވެސް ފިނި މޫސުމުގައި ދިމާވާ ކަމެއް ކަމަށާއި، ކުއްލި ހާލަތެއް ނެތް ކަމަށް ވެސް ބުނެފައިވެއެވެ.
ނަމަވެސް ރާއްޖޭގައި ނޭވާލާ ނިޒާމުގެ ބަލިތައް އިތުރުވެދާނެތީ، ރޯގާ އަދި ކެއްސުންފަދަ އަލާމާތްތައް ހުންނަ ފަރާތްތަކުން އާންމު ތަންތަނަށް ނުކުންނައިރު މާސްކް އެޅުމަށް އެޗްޕީއޭއިން އިލްތިމާސްކޮށްފައިވެއެވެ. އަދި އުމުރުން ދުވަސްވީ މީހުންނާއި ތުއްތު ކުދިންނަށް ޒިޔާރަތް ނުކުރުމަށް ވެސް އެދިފައިވެއެވެ.
ބަލިޖެހިގެން ބޮޑުވަރުވެދާނެ ފަރާތްތަކުގެ ތެރޭގައި ނޭވާލާ ނިޒާމުގެ ބަލި ހުންނަ މީހުންނާއި، ދިފާއީ ބާރު ބަލިކަށި މީހުންނާއި، އުމުރުން ދުވަސްވީ މީހުންނާއި، ކުޑަކުދިންނާއި، މާބަނޑު މީހުން ހިމެނެއެވެ. މި ފަރާތްތަކުން ބަލީގެ އަލާމާތްތައް ފެނުމާއެކު އަވަހަށް ސިއްހީ ފަރުވާ ހޯދުމަށް އެޗްޕީއޭއިން އިރުޝާދު ދީފައިވެއެވެ.
