ކ. ގުޅީގެ ރައްޔިތުންނާ ރައީސް މުއިއްޒު ބައްދަލުކުރެއްވި ޖަލްސާގައި ވާހަކަފުޅު ދައްކަވަމުން އަނާރާ ވިދާޅުވީ، ގުޅި، ހުރާ އަދި ހިންމަފުށީގެ ކަންކަން ވަރަށް ގާތުން ބައްލަވައި، ރައްޔިތުން އެދޭ ކަންކަމަށް އަވަސް ހައްލު ހޯއްދަވަމުން ގެންދަވާ ކަމަށެވެ.
އަނާރާ ފާހަގަކުރެއްވި ގޮތުގައި ކުޑަ ދުވަސްކޮޅެއްގެ ތެރޭގައި ހުރާ ދާއިރާގެ ހުރިހާ ރަށަކަށް ރައީސް ޒިޔާރަތްކުރެއްވުމަކީ އެ ރަށްތަކަށް ލިބުނު ވަރަށް ބޮޑު ޝަރަފެކެވެ. އަދި ގުޅީގެ ރައްޔިތުންނަށް ދިމާވެފައިވާ އެންމެ ބޮޑު މައްސަލަތަކުގެ ތެރޭގައި ބޯހިޔާވަހިކަމުގެ ދަތިކަން ހިމެނޭ ކަމަށް ވިދާޅުވިއެވެ.
ގުޅީގެ ގެތަކަށް ކުރެއްވި ޒިޔާރަތުގައި ގިނަ އާއިލާތަކެއް އެއް ގެއެއްގައި ދިރިއުޅެމުންދާ މަންޒަރު ފެނިވަޑައިގަތް ކަމަށާއި، މި މައްސަލައަށް ރައީސް މުއިއްޒުގެ ސަރުކާރުން އަވަސް ހައްލެއް ގެނެސްދެއްވާނެ ކަމުގެ ޔަގީންކަން އޮތް ކަމަށް އަނާރާ ވިދާޅުވިއެވެ.
މީގެއިތުރުން، ގުޅީގެ ބަނދަރުގެ ޖާގައިގެ ދަތިކަމާއި، އާ މިސްކިތެއްގެ ބޭނުން އޮތްކަމާއި، ސްކޫލް އިމާރާތުގެ މަސައްކަތް އަވަސްކުރުމާއި، ސިއްހީ މަރުކަޒުގައި ލެބޯޓްރީގެ ހިދުމަތް ގާއިމުކުރުމަކީ ރައްޔިތުންގެ އެދުމެއް ކަމުގައިވެސް އަނާރާ ފާހަގަކުރެއްވިއެވެ.
