
މައުލޫމާތު ލިބިފައިވާ ގޮތުގައި، ކަސްޓަމްގެ 20 އޮފިސަރުން ފައިސާ ހޯދާފައި ވަނީ ޑިއުޓީ އޮޅުވާލައިގެންނާއި ކަސްޓަމްސްއިން ދޭ އެހެނިހެން ހިދުމަތްތަކުގެ ތެރެއިންނެވެ. އެ މައްސަލަ ފުލުހުންގެ އިތުރުން ރައްޔިތުންގެ މަޖިލީހުން ވެސް ދަނީ ބަލަމުންނެވެ.
ފުލުހުން މިއަދު ބުނީ ކަސްޓަމްސްގެ މުވައްޒަފުންތަކަށް ތުހުމަތު ކުރެވޭ މަނީ ލޯންޑަރިން އާއި ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައުމާ ގުޅިގެން މިދިޔަ އަހަރުގެ އޯގަސްޓް 19 ވަނަ ދުވަހުން ފެށިގެން މައްސަލަ ތަހުގީގު ކުރަމުންދާ ކަމަށެވެ.
އެކަމަކު ފުލުހުންވެސް އިތުރަށް މިމައްސަލައިގައި ތަފްސީލެއް ނުދިނެވެ.
މި މައްސަލައާ ގުޅުންހުރި ބައެއް ކަންކަން ރައްޔިތުންގެ މަޖިލީހުގެ 241 ކޮމިޓީއަށް ހުށަހަޅާފައިވާ ކަމަށާއި، ކޮމިޓީގެ ބައްދަލުވުންތައް ސިއްރުކޮށްގެން ސަރުކާރުގެ ކަމާ ގުޅުންހުރި އިދާރާތަކުގެ ބައެއް އިސްވެރިންނާ ސުވާލުކޮށްފައިވާ ކަމަށްވެސް މައުލޫމާތު ލިބިފައިވާވެ އެވެ.
ޔުނިފޯމް އެޅި މުއައްސަސާތަކާ މެދު ވެސް އިތުބާރު ކޮށްގެން ބަލަން ތިބެވެން ނެތް ކަމަށާއި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމުގައި ވެސް ހައްލުތަކެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިދިޔަ ޑިސެމްބަރު މަހު ވިދާޅުވެފައި ވެ އެވެ.
ނާޒިމް ވިދާޅުވީ ރާއްޖޭގެ ބޯޑަރު ހުރަސްކޮށް، މަސްތުވާތަކެތި އެތެރެ ނުވާނެ ކަމުގެ ޔަގީންކަން ރައްޔިތުންނަށް ދޭން ޖެހޭ ކަމަށެވެ. އަދި އެކަމަކީ މަޖިލީހުގެ މެންބަރުން ކުރަންޖެހޭ ކަމެއް ކަމަށް ނާޒިމް ވިދާޅުވި އެވެ. އޭނާ އިތުރަށް ވިދާޅުވީ ޔުނިފޯމް އެޅި މުއައްސަސާތަކުން އެކަން ކަށަވަރުކުރުމުގައި ވަރަށް ބޮޑަށް އިހުމާލުވެފައިވާ ކަމަށެވެ.
ކަސްޓަމްސް އޮފިސަރުންތަކެއްގެ ހިޔާނާތުގެ މައްސަލައެއް ފެންމަތިވެފައިވާއިރު، ކަސްޓަމްސްގެ އޮފިސަރުންގެ ބައިވެރިވުމާއެކު ގަވާއިދާ ހިލާފަށް ރާއްޖެއަށް ބައެއް ތަކެތި އެތެރެކޮށް ހަދާ ކަމުގެ ތުހުމަތު އަބަދުވެސް އޮވެ އެވެ.