ހުޅުވުމަށް ތައްޔާރުވަމުން އަންނަނީ އަމާން އުދަރެސްގެ 11، 12، 13 އަދި 14 ވަނަ ޓަވަރުތަކެވެ. މަސައްކަތް ފެބްރުއަރީ މަހުގެ ދެވަނަ ހަފްތާގައި ނިމި، ދިރިއުޅުމަށް ބޭނުންވާ ހުރިހާ ވަސީލަތްތަކާއެކު މާޗް މަހުގެ ތެރޭގައި ހުޅުވޭނެ ކަމަށް އެ ކުންފުނިން ބުނެއެވެ.
އަމާން އުދަރެސް މަޝްރޫއަކީ އިންޑިއާގެ ކަލްޕަތާރޫ ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާ ހަވާލުކޮށްގެން ކުރިއަށްގެންދާ މަޝްރޫއެކެވެ. މި މަޝްރޫއުގެ ދަށުން 16 ޓަވަރެއްގައި 2،000 ފްލެޓް އިމާރާތްކުރެވެއެވެ. މީގެ ތެރޭގައި 900 އަކަފޫޓުގެ ތިން ކޮޓަރީގެ 1،400 ޔުނިޓާއި 650 އަކަފޫޓުގެ ދެ ކޮޓަރީގެ 600 ޔުނިޓް ހިމެނެއެވެ.
އެފްޑީސީން ބުނީ މުޅި މަޝްރޫއުގެ ހުރިހާ ޓަވަރެއްގެ މަސައްކަތް މި އަހަރުގެ ޖޫން މަހުގެ ތެރޭގައި ނިމޭނެ ކަމަށެވެ. ނަމަވެސް ފްލެޓް ލިބޭ ފަރާތްތަކުގެ ލިސްޓާ މެދު އުފެދިފައިވާ މައްސަލަތަކާ ގުޅިގެން، އަލުން ލިސްޓް މުރާޖައާކުރުމުގެ މަސައްކަތް ސަރުކާރުން ކުރިއަށް ގެންދާ ކަމަށް ވެސް ފާހަގަކޮށްފައިވެއެވެ.
