ކުރީގެ ރައީސް ޔާމީނުގެ ވެރިކަމުގައި ހުޅުމާލޭގެ ދެވަނަ ފިޔަވަހީގައި އިމާރާތް ކުރި ހިޔާ ފްލެޓުތަކުން ފްލެޓު ލިބިފައި އޮތް ސިފައިންގެ ދެމީހަކަށް، ސިފައިންގެ ކޯޕަރޭޓިވް (ސިފްކޯ) ގެ ފްލެޓު ނުދޭން ނިންމި ނިންމުން ބަދަލުކޮށް އެ ދެ މީހުންނަށް ފްލެޓުތައް ހަވާލުކޮށްފި ކަން ހާމަވީ އިއްޔެ ސިވިލް ކޯޓުން ކުރި ހުކުމަކުންނެވެ.
ސިފްކޯ ފްލެޓް ނުދޭން ނިންމި ނިންމުންމާ ގުޅިގެން ސިފައިންގެ ދެ މީހަކު ވަނީ ސިފްކޯއާ ދެކޮޅަށް ދައުވާކޮށްފަ އެވެ. އެއީ، ޔޫސުފް ނިޝާރު، ހ. ތުލްޒާ އާއި އިސްމާއީލް މުއާޒު، މއ. ހަލްކާ އެވެ.
ސިވިލް ކޯޓުގެ ހުކުމުން އެނގުނު ގޮތުގައި، އެ ދެ މީހުން ވަނީ މައްސަލަ އަނބުރާ ގެންގޮސްފަ އެވެ. މައްސަލަ އަނބުރާ ގެންދިޔައީ، މައްސަލަ ކުރިއަށް ދަނިކޮށް ފްލެޓް ދޭން ސިފްކޯއިން ނިންމައި އޭގެ އެއްބަސްވުމުގައި ވެސް ސޮއިކުރުމުން ކަމަށް ހުކުމުން އެނގުނެވެ.
އެ ދެމީހުންނަށް ސިފްކޯގެ ފްލެޓު ނުދޭން އެ ކުންފުނިން ނިންމިއިރު، އެ ދެމީހުން ވެސް އޮތީ ސިފްކޯގެ ފްލެޓަށް ދައްކަންޖެހޭ ޑައުންޕޭމަންޓު ފައިސާ ދައްކައިފަ އެވެ. ސިފްކޯގެ ފްލެޓަށް ޑައުންޕޭމަންޓުގެ ގޮތުގައި މުއާޒު 95،000ރ. އަދި ނިޝާރު 91،200ރ. ދައްކާފައިވެ އެވެ.
ސިވިލް ކޯޓުން އިއްޔެ ކުރި ހުކުމުގައި ބުނެފައި ވަނީ ސިފްކޯއިން އެ ދެމީހުން ވެސް ހޯދަން އެދުނު ފްލެޓު ސުލްހަވެރިކަމާއެކު ހަވާލުކޮށްފައި ވާތީ، މައްސަލަ އަނބުރާ ގެންދިޔުމަށް ހުށަހެޅި ހުށަހެޅުމަށް ރިއާއަތްކޮށް ދައުވާ ފޯމުތައް ބާތިލު ކޮށްފައިވާ ކަމަށެވެ. މި ހުކުމް ކުރީ ގާޒީ ހާފިޒާ އަބްދުއްސައްތާރެވެ.
