ދައުލަތުން ޝިޔާމްގެ މައްޗަށް އުފުލާފައިވާ ދައުވާއަކީ، ވިލިމާލޭގައި ހުންނަ ކޯސްޓްގާޑްގެ އެމްއާރުސީސީގެ އިމާރާތުގައި، 2017 ވަނަ އަހަރުން ފެށިގެން ޝިޔާމްގެ ބައްފަ ދިރިއުޅެން ބެހެއްޓި މައްސަލާގައެވެ. ޝިޔާމްގެ ބައްޕަ މިހާރުވަނީ ނިޔާވެފަ އެވެ. މި މައްސަލައިގައި ކްރިމިނަލް ކޯޓުގެ ގާޒީ އައިމިނަތު އަޒްލިފާ މިދިޔަ އަހަރުގެ އޮކްޓޫބަރު މަހު ހުކުމް ކުރެއްވީ، ޝިޔާމްގެ ބައްޕަ ސިފައިންގެ ވީއައިޕީ ގެސްޓްހައުސްގައި ބެހެއްޓީ ނުފޫޒެއް ބޭނުންކޮށްގެންކަން ދައުލަތަށް ބުނެދެވިފައި ނެތް ކަމަށެވެ.
ކޯޓުން މި މައްސަލައިގެ ހުކުމް ކުރިއިރު، މިއީ ކޮރަޕްޝަން އެކުލެވިގެން ނުވާ ކަމެއް ކަމަށް ކަނޑައަޅައި އޭސީސީން ކުރިން ނިންމާފައިވާ މައްސަލައެކެވެ.
ނަމަވެސް، 2020 ވަނަ އަހަރުގެ ތެރޭގައި މައްސަލަ އަލުން ހުޅުވައި ދައުވާކުރަން ފޮނުވީ ޕްރޮސެކިއުޓާ ޖެނަރަލް އޮފީހުން މި މައްސަލައާ ގުޅިގެން އިތުރު ކަންތައްތަކެއް ފާހަގަކޮށްފައިވާތީ އެކަން ކަމަށް ރިއާޔަތްކޮށެވެ.
ދައުލަތުން މި މައްސަލަ ހައިކޯޓުގައި އިސްތިއުނާފުކޮށްފައިވަނީ މިދިޔަ ހަފްތާގަ އެވެ. މި މައްސަލަ ހައިކޯޓަށް ބަލައިގަތުމާމެދު އެ ކޯޓުން އަދި ގޮތެއް ނިންމިކަމެއް އެނގިފައެއް ނެތެވެ.
