ރައީސް ވަނީ މީގެ ކުރިން ވެސް ކައުންސިލުތަކުގައި ކައުންސިލަރުންގެ އަދަދު މާގިނަ ކަމަށް ވިދާޅުވެ، ކައުންސިލުތަކުގެ ކޮމްޕޮޒިޝަނަށް ބަދަލުތަކެއް ގެންނަން ޖެހޭކަން ފާހަގަކުރައްވައިފަ އެވެ. ނަމަވެސް އެކަމާ ދެކޮޅަށް އިދިކޮޅު ފަރާތްތަކުން ވަނީ ވާހަކަތައް ދައްކައިފަ އެވެ. އަދި ބައެއް ކައުންސިލަރުންނާއި، ކައުންސިލްތަކުން ވެސް ކަންބޮޑުވުން ފާޅުކުރިއިރު އާންމުންގެ ތެރެއިން ވެސް ނުރުހުން އަމާޒުވި އެވެ.
ގދ. ފިޔޯރީއަށް ވަޑައިގެން އެރަށު ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް މިރޭ ވިދާޅުވީ، ހަރަދު ކުޑަ ކުރުމަށްޓަކައި ސަރުކާރުން ކަންތަައްތަކެއް ކުރަން ޖެހޭ ކަމަށެވެ.
ރައީސް ވިދާޅުވީ، މީގެ ތެރެއިން އެއް ކަންބޮޑުވުމަކަށްވީ ކައުންސިލަރުންގެ އަދަދު މަދުކޮށްފިނަމަ، ޑިމޮކްރެޓިކް ރިޕްރެޒެންޓޭޝަނަށް އަސަރު ކުރާ ވާހަކަ ކަމަށެވެ. އެއީވެސް ކަންބޮޑުވުމެއް ކަމަށާއި، ބޭނުންވަނީ ހަރަދު ކުޑަ ކުރަން ކަމަށް ރައީސް ވިދާޅުވި އެވެ.
މީގެ އިތުރުން ރައީސް ވިދާޅުވީ ކައުންސިލްގެ ރައީސްކަމުގެ މަގާމަށް ކުރިމަތިލާ މީހާއާއި އެކުގައި އިތުރު މީހަކު ރަނިންމޭޓްކަމަށް ކުރިމަތިލާ ގޮތަށް ވެސް އެ ކަން ކުރެވިދާނެ ކަމަށެވެ. އަދި މިގޮތަށް އަންހެނުންގެ ތަރައްގީއަށް މަސައްކަތްކުރާ ކޮމެޓީ (ޑަބްލިއުޑީސީ) ވެސް ބަދަލު ކުރެވިދާނެ ކަމަށް ރައީސް ވަނީ ވިދާޅުވެފަ އެވެ.
ރައީސް ވަނީ ކުރިއަށް އޮތްތަނުގައި މިކަމަށް ވަރަށް ސީރިއަސް ގޮތެއްގައި ފަންނީ ލެވެލްގައިވެސް، އަދި އާއްމު ރައްޔިތުންގެ މަޝްވަރާތަކުގައިވެސް މިކަމަށް ހިޔާލު ބަދަލުކޮށް، އެކަށީގެންވާ ގޮތަކަށް މިކަމަށް ހައްލެއް ގެނައުމަކީ ކުރަން ޖެހޭ ކަމެއް ކަަން ފާހަގަކުރައްވާފަަ އެވެ.
