މި ވަގުތު މަޖިލީސް އޮތީ ދައުރު ނިންމުމަށް ފަހު ޗުއްޓީގަ އެވެ. މަޖިލީސް އަލުން ހުޅުވޭނީ އަންނަ މަހެވެ.
ސަރުކާރު ހިންގާ ޕާޓީ، ޕީއެންސީގެ ޕާލަމެންޓަރީ ގްރޫޕް ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ ފެބްރުއަރީ 6 ގައި މަޖިލީހުގެ އާ ދައުރު ފަށައި، ރިޔާސީ ބަޔާން އިއްވުމުގެ ޖަލްސާ އޮންނާނެ ކަން ކަށަވަރު ކޮށްދީފަ އެވެ.
ކޮންމެ އަހަރެއްގެ ވެސް މަޖިލިސް ހުޅުވާ ޖަލްސާއެއްގައި އޭރަކު ހުންނަވާ ރައީސެއްގެ ރިޔާސީ ބަޔާން އިއްވާނެ އެވެ. މިއީ ރައީސް މުއިއްޒު ދެއްވާނެ ދެވަނަ އަދި 20 ވަނަ މަޖިލީހުގައި އިއްވާނެ ފުރަތަމަ ރިޔާސީ ބަޔާނެވެ. އެމަނިކުފާނުގެ ފުރަތަމަ ރިޔާސީ ބަޔާން މިދިޔަ އަހަރުގެ މަޖިލީހުގެ ފުރަތަމަ ޖަލްސާގައި އިއްވިއިރު އޭރު އޮތީ އެމްޑީޕީގެ މެޖޯރިޓީ އޮތް 19 ވަނަ މަޖިލީހެވެ.
ގާނޫނުއަސާސީގައިވާ ގޮތުން ރިޔާސީ ބަޔާނަކީ ގައުމެއްގެ ހާލަތު ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅުކުރުމަށްޓަކައި ކުރަން ޖެހޭ ކަމަށް ރައީސަށް ފެންނަ ކަންކަމުގެ މައްޗަށް އެކުލެވޭ ބަޔާނެކެވެ.
މަޖިލީހުގެ އާ ދައުރު ފެބްރުއަރީ މަހުގެ ފުރަތަމަ ހަފުތާގައި ފަށާއިރު އޭގެ ކުރިން މި މަހުގެ ތެރޭގައި ވެސް ދައުރުން ބޭރުން ދެ ޖަލްސާއެއް ކުރިޔަށް ގެންދަން ވަނީ ނިންމައިފަ އެވެ.
