ސްޓެލްކޯއިން ހުޅުމާލެ ދެވަނަ ފިޔަވަހީގެ އައު ސަބްސްޓޭޝަން ބޭނުން ކުރަން ފަށާފައިވާއިރު، މިމަސައްކަތް ކޮށްފައިވަނީ މިއަދު ހެނދުނު އެވެ.
ސްޓެލްކޯއިން ވަނީ މިމަސައްކަތް ފެށުމުގެ ކުރިން މަސައްކަތް ކުރިއަށްދާ ވަގުތު ކަރަންޓު ހިދުމަތް މާލޭގެ ބައެއް ސަރަހައްދުތަކުން އެއް ގަޑިއިރަށް މެދުކެނޑިދާނެ ކަން އަންގާފަ އެވެ. އެގޮތުން ހެނދުނު 06:00 އާއި 08:00 އާއި ދެމެދު 1 ގަޑިއިރަށް މާލޭގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑުނު ކަމަށް ވަނީ ބުނެފަ އެވެ.
މިމަސައްކަތް ކާމިޔާބުކަމާއި އެކު ނިމުމާއި ގުޅިގެން ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ މީސްމީޑިއާގެ ކުރެއްވި ޕޯސްޓެއްގައި ވިދާޅުވީ، އެކުންފުނީގެ ނެޓްވޯކް އަޕްގްރޭޑް ކުރުމުގެ މަސައްކަތް ކާމިޔާބު ކަމާއެކު ނިންމާލާފައިވާކަމަށެވެ. އަދި މިމަސައްކަތް ކުރިއަށްދިޔަ ވަގުތު ކަރަންޓު ހިދުމަތް ދިނުމަށް ދަތިކަމެއް ކުރިމަތިވެފައި ނުވާ ކަމަށް ފަހުމީ ވިދާޅުވި އެވެ.
ހުޅުމާލޭގެ ދެވަނަ ފިޔަވަހީގައި ގާއިމު ކޮށްފައި ހުންނަ ސަބް ސްޓޭޝަންތަކުގެ ބޭނުމަކީ އެ ސަރަހައްދުގެ ކަރަންޓުގެ މައްސަލަ ހައްލު ކުރުމެވެ. ޖުމުލަ 132-ކޭވީގެ ސަބްސްޓޭޝަން މާލޭގެ ގްރިޑާ ގުޅައިލުމުން މާލެ ސަރަހައްދުގެ ގްރިޑު ވެސް އިތުރަށް ސްޓޭބަލް ވާނެ އެވެ.
ސްޓެލްކޯ އިން ބުނީ ދެން އޮތީ ފޭސް 2ގައި ގާއިމްކޮށްފައިވާ 11 ކޭވީ ނެޓްވޯކްގެ ކޭބަލްތައް ސަބްސްޓޭޝަނަށް ބަދަލުކުރުން ކަމަށާއި އެމަސައްކަތް ވެސް ވަރަށް އަވަހަށް ކުރިއަށް ގެންދާނެ ކަމަވެ.
