ކުރިން އެމްޑީޕީގައި އިސް މަގާމުތަކުގައި ތިބުމަށްފަހު ދަ ޑިމޮކްރެޓްސް އުފެއްދި ބައެއް މެމްބަރުން ވަނީ އެޕާޓިން ވަކިވެ އަލުން އެމްޑީޕީއާ ގުޅިފައެވެ. އޭގެ ތެރޭގައި އެމްޑީޕީގެ ކުރީގެ ޗެއާޕާސަން އަދި ފަހުން ޑިމޮކްރެޓްސްގެ ރައީސް ހަސަން ލަތީފާއި އެމްޑީޕީގެ ކުރީގެ ނައިބު ރައީސް އަދި ފަހުން ޑިމޮކްރެޓްސެގެ ނައިބު ރައީސްގެ ގޮތުގައި ހުންނެވި މުހައްމަދު ޝިފާޒާއި، މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމްގެ އިތުރުން މިދިޔަ އެމްޑީޕީ ވެރިކަމުގައި އެސްޓީއޯގެ އެމްޑީކަން ކުރެއްވި ހުސައިން އަމްރު ހިމެނިވަޑައިގަންނަވައެވެ.
މި މެމްބަރުން ވަކިވުމުން ދަ ދިމޮކްރެޓްސްއިން ވަނީ އެޕާޓީގެ ނެޝެނަލް އެސެމްބްލީ ރޭ ބާއްވާފައެވެ. މި ބައްދަލވުމުގައި ޕާޓީގެ އަސާސީ ގަވާއިދާ އެއްގޮތަށް ހުސްވެފައިވާ ޕާޓީގެ ރައީސްކަމުގެ މަސްއޫލިއްޔަތުތައް އަދާކުރުމަށް، ޕާޓީގެ ނައިބު ރައީސުންގެ ތެރެއިން، ނެޝަނަލް އެސެމްބްލީގެ ސިއްރު ވޯޓަކުން ވަނީ ހުސައިން ފިރުޝާން އިންތިހާބު ކޮށްފައެވެ. އަދި 40 ދުވަހުގެ މުއްދަތުގެ ތެރޭގައި އިންތިހާބެއް ބޭއްވުމަށްފަހު ހުސްވެފައިވާ ރައީސްއާއި ނައިބު ރައީސްގެ މަގާމަށް މީހުން އިންތިހާބުކުރުމަށްވެސް ޑިމޮކްރެޓްސްގެ ނެޝެނަލް އެސެމްބްލީން ރޭ ވަނީ ފާސްކޮށްފައެވެ.
ރޭ ބޭއްވި ޑިމޮކްރެޓްސްގެ ނެޝެނަލް އެސެމްބްލީގައި ރައީސް މުޙައްމަދު ނަޝީދު ވަނީ ބައިވެރިވެ ވަޑައިގެން ވާހަކަ ދެއްކެވިކަމަށް އެޕާޓީން ބުނެއެވެ.
ނަޝީދު އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަދި ދަ ޑިމޮކްރެޓްސްގައި ވެސް މިވަގުތު އަމަލީ ގޮތުން އެއްވެސް ސިޔާސީ މަސައްކަތެއް ނުކުރައްވާނެ ކަމަށެވެ. އެހެންނަމަވެސް ރާއްޖޭގެ ސިޔާސީ ހަރަކާތުން މުޅިން ދުރުނުވާނެކަމަށްވެސް ނަޝީދު ވިދާޅުވިއެވެ.
