މިދިޔަ ބުރާސްފަތި ދުވަހު ދައުރުން ބޭރުން ބޭއްވި ފުރަތަމަ ޖަލްސާގައި، އޭސީސީއަށް އައްޔަން ކުރަން ރައީސް ފޮނުއްވި ލިސްޓުގެ އެންމެ ކުރީގައި އޮތީ އަހުމަދު ނާޝިދު އާއި އާސިޔާ އަޒީމާއެވެ. އެހެންނަމަވެސް ދައުރުން ބޭރުން މިއަދު ބޭއްވި ޖަލްސާއަށް އަލުން ލިސްޓަށް ބަދަލު ގެންނަވާ ރައީސް ވަނީ ފޮނުއްވާފައެވެ. މިއަދު ފޮނުއްވި ލިސްޓުގައި އާސިޔާގެ ބަދަލުގައި ފޮނުއްވާފައި ވަނީ އަބްދުﷲ ނާޝިދުގެ ނަމެވެ.
އެ ނަންތައް ދިރާސާ ކުރުމުގެ މަސައްކަތް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މިއަދުން މިއަދަށް ވަނީ ނިންމާފައެވެ. އަދި ކޮމެޓީން ނަންތަކަށް ރުހުންދޭން ފާސްކޮށްް މަޖިލީހުން މިއަދު ހަވީރު ބޭއްވި ޖަލްސާގައި ވަނީ ވޯޓަށް އަހާފައެވެ.
އޭސީސީއަށް އައްޔަންކުރަން ރައީސް ފޮނުއްވި ދެ ނަން މަޖިލީހުން ފާސްކުރީ ހަވީރު ޖަލްސާގައި ބައިވެރިވި 67 މެންބަރުންގެ އިއްތިފާގުންނެވެ.
އޭސީސީގެ ދެ ގޮނޑި ހުސްވީ ކޮމިޝަންގެ ނައިބު ރައީސް އަބްދުއްސަލާމާއި މެމްބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމުންނެވެ. އެ ދެ މެންބަރުން އިސްތިއުފާ ދެއްވީ އެ ދެ މެންބަރުންގެ އިތުބާރު ނެތް ކަމަށް ވޯޓު ނަގަން މަޖިލީހުން ތައްޔާރުވެފައި ވަނިކޮށެވެ.
އޭސީސީގެ މެންބަރުންގެ ގޮތުގައި މިހާރު ތިބި މެންބަރުންނަކީ އާދަމް ޝާމިލް(ރައީސް) ޝިޔާމާ މުހަންމަދު އަދި ޝަޒްނާއެވެ.
