އިންޑިޔާގެ ގައުމީ ޓީމާއެކު ދިވެހި ގައުމީ އަންހެން ޓީމުން މިދިޔަ ޑިސެމްބަރު މަހު ފަހު ހަފްތާގައި ކުޅުނު މެޗާއި، ޖަނަވަރީ ފުރަތަމަ ހަފްތާގައި ކުޅުނު މެޗުންވަނީ ބޮޑު ތަފާތަކުން ބަލިވެފައެވެ.
އިންޑިޔާއާ ރާއްޖެ ކުޅުނު ދެވަނަ މެޗުން ރާއްޖެ ބަލިވީ 11 ލަނޑު އެއް ލަނޑުންނެވެ. މި ދެ ޓީމުގެ ފުރަތަމަ މެޗުން ރާއްޖެ ބަލިވީ 14 ލަނޑު ސުން ލަނޑުންނެވެ.
މި ދެ މެޗަށް ކުރި ހަރަދު ކުޅިވަރު މިނިސްޓްރީން ހާމަކޮށްފައިވާއިރު، އެއަރ ޓިކެޓަށް 340،011 ރުފިޔާ އަދި ޓީމުގެ ޖޯޒީއަށް، 33،750 ރުފިޔާ ހަރަދު ކޮށްފައިވެއެވެ. މާނައަކީ އެ މެޗަށް ދައުލަތުން ޖުމްލަ 373,761 ރުފިޔާ ހަރަދު ކުރުމެވެ. މި ދެ މެޗު ކުޅުނީ އިންޑިޔާގެ ބެންގަލޫރުގައެވެ.
ދެ މެޗުން ރާއްޖެ ކޮޅަށް ޖުމްލަ 25 ލަނޑު ވަތް އިރު، ރާއްޖެއަށް ޖެހުނީ އެންމެ ލަނޑެކެވެ.
ރާއްޖޭގައި 2014 ވަނަ އަހަރުން ފެށިގެން، މިވީ 10 އަހަރު އަންހެން ފުޓްބޯޅައިގެ ރަސްމީ މުބާރާތެއް ނެތްއިރު، އެކަށީގެންވާ ތައްޔާރެއް ނުވެ، މި ފަދަ މެޗުތައް ކުޅެން ޖެހޭތޯ ބައެއް ފަރާތްތަކުން އަންނަނީ ސުވާލު އުފައްދަމުންނެވެ. މީގެ އިތުރުން، އަންހެން ޓީމުގެ ދަތުރާ ގުޅޭ ސީރިއަސް މައްސަލައެއް އެފްއޭއެމުން ބަލަމުން އަންނަ ކަމަށްވަނީ މައުލޫމާތު ލިބިފައެވެ. އެހެންނަމަވެސް އެކަމުގެ ތަފްސީލެއް އެފްއޭއެމުން އަދި ހާމަ ނުކުރެއެވެ.
