
އެއާ އެމްބިއުލާންސްގެ ހިދުމަތް ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެއާ އެމްބިއުލާންސްގެ ހިދުމަތްދޭން ފެށީ މިދިޔަ އަހަރުގެ މާރިޗުމަހުގެ 1 ވަނަދުވަހުއެވެ. އެ ހިދުމަތުގައި ބޭނުންކުރަނީ ގައުމީ އެއާލައިން މޯލްޑިވިއަންގެ ޑޭޝް 8 މަރުކާގެ ބޯޓެކެވެ.
ހެލްތް މިނިސްޓްރީން މިއަދު އެކްސްގައި އާއްމުކުރި ޕޯސްޓެއްގައި ބުނީ މިހާތަނަށް އެއާ އެމްބިއުލާންސްގެ ހިދުމަތް މެދުވެރިކޮށް 700 ދަތުރުކޮށްފައިވާކަމަށެވެ. އަދި 804 ބަލި މީހުންނަށް އެހީތެރިކަން ފޯރުކޮށްދީފައިވާކަމަށްވެސް ހެލެތް މިނިސްޓްރީން ބުނެއެވެ.
އެއާ އެމްބިއުލާންސް އަށް ބޭނުންވާ ސްޕެޝަލައިޒްޑް އިކުއިޕްމަންޓްތައް ހަދިޔާ ކުރީ އުރީދޫ މޯލްޑިވްސް އިންނެވެ. އޫރީދޫ މޯލްޑިވްސްއިން އެއާ އެމްބިއުލާންސް ހިދުމަތަށް ބޭނުންވާ ތަކެތި ފޯރުކޮށްދިނުމަށް މިހާތަނަށް 16 މިލިއަން ރުފިޔާ ހަރަދުކޮށްފައިވާކަމަށް އެ ކުންފުނިން ވަނީ ބުނެފައެވެ.
ސަލާމަތީގޮތުން ރައްކާތެރި އަދި އިތުބާރު ކުރެވޭ ގޮތަށް ފަރުމާކޮށްފައިވާ ޑީއެޗްސީ-6 ޓްވިން އޮޓާގައި އެއާ އެމްބިއުލާންސްގެ ހިދުމަތް ފޯރުކޮށްދިނުމަކީ ރައްޔިތުންނަށް ސިއްހީ ގޮތުން ލިބިފައިވާ ބޮޑު ކުރިއެރުމެއް ކަމަށާއި އެ ސީޕްލޭންގައި ރާއްޖޭގެ ރަށްތަކަށް އޮޕަރޭޓްކުރުމުގެ ގާބިލްކަން ލިބުމުގެ އިތުރަށް ޒަމާނީ އިމަޖެންސީ މެޑިކަލް ވަސީލަތް ހަރުކޮށްފައިވާ ކަމަށް ސަރުކާެރުން ވަނީ ބުނެފައެވެ.