މިހެން އޭނާ ވިދާޅުވީ ރައްޔިތުންގެ މަޖިލީހުގެ ދައުރުން ބޭރުން ހޯމަ ދުވަހު ބޭއްވި ޖަލްސާގައި، އޭސީސީއަށް އާ މެންބަރުން އައްޔަންކުރުމާ ގުޅޭ ބަހުސްގައެވެ.
އޭސީސީއަށް މެންބަރުން އައްޔަންކުރުމުގެ ޖަލްސާގައި އިދިކޮޅު މެންބަރުން ވަނީ ސަރުކާރަށް ކޮރަޕްޝަނުގެ ތުހުމަތުތަކެއް ކޮށްފައެވެ. އަދި އެ މައްސަލަތައް ބެލުމުގެ ފުރުސަތު ނެތްކަމަށްވެސް ބުނެފައިވެއެވެ. ނަމަވެސް މި ތުހުމަތުތަކަށް ރައްދުދެމުން ހުސްނީ މުބާރިކް ވިދާޅުވީ މި ސަރުކާރަކީ ކޮރަޕްޝަނަށް ފުރުސަތުދޭނެ ސަރުކާރެއް ނޫންކަމަށެވެ.
ސަރުކާރު ހިއްސާވާ ކުންފުނިތަކުގައި ކޮރަޕްޝަނުގެ މައްސަލަތައް ހިނގާނަމަ، މިނިވަންކަމާއެކު އެ މައްސަލަތައް ބެލުމުގެ ފުރުސަތު ސަރުކާރުން ދެމުންދާކަމަށް ހުސްނީ ވިދާޅުވިއެވެ.. އަދި އޭސީސީއަށް އެ ކޮމިޝަނުގެ މަސްއޫލިއްޔަތު އެންމެ ފުރިހަމަ ގޮތުގައި އަދާކުރުމަށް ސަރުކާރުން ހުރަސް ނާޅާނެކަމަށްވެސް އޭނާ ވިދާޅުވިއެވެ.
ރައީސް މުއިއްޒުވެސް ވަނީ ކޮރަޕްޝަނުގެ މައްސަލަތަކުގައި ހަމަހަމަކަމާއެކު ފިޔަވަޅު އެޅުއްވުމަށް އިސްކަންދެއްވާނެކަމަށް ވިދާޅުވެފައެވެ. އަދި ކުރީގެ ސަރުކާރުތަކާ ތަފާތުކޮށް، ކޮރަޕްޝަނުގެ މައްސަލަތަކަށް ފިޔަވަޅު އެޅުއްވުމުގައި ފަސްޖެހިވަޑައިނުގަންނަވާނެކަމަށްވެސް ވިދާޅުވެފައިވެއެވެ.
