ލީގު އުސޫލުން 36 ޓީމުގެ މެދުގައި ކުޅޭ މި މުބާރާތުގެ ގަދަ 8 ޓީމަށް، މުބާރާތުގެ ގަދަ 16 ޓީމުގެ ބުރުން ސީދާ ޖާގައެއް ލިބޭނެ އެވެ. އަދި ނުވަ ވަނަ އާއި 24 ވަނަ އާ ދެމެދު ނިންމާ ޓީމުތަކަށް ގަދަ 16 ޓީމުގެ ބުރުން ފުރުސަތު ލިބޭނީ ޕްލޭއޮފް ބުރެއް ކުޅެގެންނެވެ.
ލިވަޕޫލް ވަނީ ރޭގެ މޮޅާ އެކު، ކުޅުނު ހަތް މެޗުން ވެސް މޮޅުވެ، ސައްތަ އިން ސައްތަ މޮޅުވުމުގެ ރެކޯޑް ދަމަހައްޓައިފަ އެވެ. އެ ޓީމު އެއް ވަނައިގައި އޮތީ 21 ޕޮއިންޓާ އެކު އެވެ. ލިވަޕޫލުން ރޭ އަމިއްލަ ދަނޑުގައި ކުޅުނު މެޗުގެ 34 ވަނަ މިނެޓުގައި މުހައްމަދު ސަލާހު ކުރި ހޯދައިދިނެވެ. މިއީ އޭނާ އެ ޓީމަށް ޔޫރަޕުގައި ޖަހައިދިން 50 ވަނަ ގޯލެވެ.
ލިލް އަށް އުނދަގޫތަކެއް ކުރިމަތިވީ 59 ވަނަ މިނެޓުގައި އެ ޓީމުގެ އައިއްސަ މަންޑީ އަށް ރަތްކާޑެއް ދެއްކުމުންނެވެ. އެކަމަކު 62 ވަނަ މިނެޓުގައި ޖޮނަތަން ޑޭވިޑްގެ ގޯލުން އެ ޓީމުން އެއްވަރު ވެސް ކުރި އެވެ. ލިވަޕޫލް މޮޅުވީ 67 ވަނަ މިނެޓުގައި ހާވޭ އެލިއޮޓް ޖަހައިދިން ގޯލުންނެވެ.
