'މާސްޓާ ދުރްގާ ރާއޯ ގުރުޖީ' ނަމަކަށް ކިޔާ ފޭސްބުކް ޕޭޖަކުން މި މީހުން ދިޔައީ ރާއްޖޭގައި ރޫހާނީ ފަރުވާގެ ހިދުމަތްތަކެއް ދޭ ކަމަށް ބުނެ އިޝްތިހާރު ކުރަމުންނެވެ. މި މީހުންނަކީ ފާލުބެލުމާއި އަތް ބެލުމާއި ސިހުރު ރަނގަޅު ކުރުމުގެ ފަރުވާގެ އިތުރުން ސިއްހީ މައްސަލަތަކާއި ކައިވެނީގެ މައްސަލަތަކަށް ހައްލު ހޯދާއިދިނުމަށް ރޫހާނީ ފަރުވާ ދޭ ބައެއްކަމަށް އެ މީހުން ވަނީ ބުނެފައެވެ.
މި ޕޯސްޓް އާއްމުވުމާއި އެކު މި މައްސަލަ ބަލަމުން އަންނަކަން އިއްޔެ ވަނީ ފުލުހުން ބުނެފައެވެ.
މި މައްސަލާގައި ހައްޔަރުކޮށްފައިވަނީ އުމުރުން 18 އަހަރާއި 25 އަހަރާއި 39 އަހަރުގެ ފިރިހެނުންނެވެ. މި އެންމެނަކީވެސް އިންޑިއާ މީހުންނެވެ.
އިމިގްރޭޝަނުން ބުނީ މި މީހުން ހައްޔަރު ކުރީ އިއްޔެކަމަށެވެ. އަދި މި މީހުން ހައްޔަރުކުރީ އެ މީހުންނަށް ދޫކޮށްފައިވާ ވިސާއާ ހިލާފުވެގެންކަމަށްވެސް އެ އިދާރާއިން ބުނެއެވެ. މި މީހުން ރާއްޖެއިން ޑީޕޯޓް ކޮށްލުމުގެ މަސައްކަތް ކުރަމުން އަންނަކަމަށްވެސް އިމިގްރޭޝަނުން ބުނެއެވެ.
