ކޮންމެ ދިމާއަކަށް ބަލައިލިޔަސް ފެންނަމުންދިޔައީ އީތަން އެވެ. ފާއިތުވި މާޒީގައި އަހަރެންގެ މުހިއްމުކަން އޭނާގެ އަމަލުތަކުން ސީދާ އަދި ނުސިދާކޮށް ދައްކުވައިދީފައިވާ އެތަށް ހާދިސާތަކެކެވެ. އެހެން ފިރިހެނަކު އަހަރެންނާއި ގާތުގައި ހުއްޓުނަސް، އަތުގައި ހިފާލިޔަސް، ސަމާސާކޮށްލިޔަސް އެކަން އީތަންގެ ކެތްތެރިކަމުގެ މިނުގެތެރެއިން ނެއްޓެ އެވެ. އަހަރެން އީތަންއަށް މުހިއްމުވާތީ އެވެ.
ލޯކުރިމަތީން ފެންނަމުންދިޔަ މަންޒަރުތައް އަހަރެންގެ ދެލޯ ފުރަމުންދިޔައީ ހޫނުކަރުނައިންނެވެ. ލޯބީގެ ރަމްޒީ ހަނދާނެއްގެ ގޮތުގައި އަހަރެން ފާހަގަކުރި 'ކިސް' އަހަރެންގެ ހިތްވަރު އެލުވާލައިފި އެވެ. އަމިއްލަ ސޫރަ ފެންނަ ވަގުތު ދަތްދޮޅި ތިރިކޮށށްލާން މަޖުބޫރު ކޮށްފި އެވެ. ދެފައިކޮޅުން ވާގިދޫވެ ކަކޫމައްޗަށް ހަށިގަނޑު ދޫވެއްޖެ އެވެ.
ވިދާ ބަބުޅަމުންދިޔަ ރިހިކުލައިގެ ތަރިތަކުގެ ދަށުގައި ހަނދު ހެކިކޮށް އަހަރުމެން ދެއްކި އެތައް ވާހަކަތަކކެއް އާލާވާން ފަށައިފި އެވެ. އީތަންގެ ގޭގެ ޓެރަސްމަތީގައި ގައިގޯޅިކޮށް ބައްދަލުކުރެވުނު ވަގުތުތަކާއި އެމަންޒަރުތައް ފެންނަން ފަށައިފި އެވެ. އެއީ ފުރިހަމަ، އުފާވެރި، ހިތްގައިމު ހަނދާންތަކެކެވެ. އެއީ ހަމައެކަނި އަހަރުމެން ދެމީހުންގެ 'އަމިއްލަ ހަނދާންތަކާއި ވަގުތު'ތަކެވެ.
އެހެން މީހަކު އެ އުފާތަކުގައި އަހަރުމެން ދުވަހަކުވެސް ޝާމިލްނުކުރަމެވެ. އެކަމަކު، އެ ހުރިހައި އުފަލާ، އއަރާމާއި ހިތްގައިމުކަމާއި އަސަރުތައް ކުޑަކުޑަ ހިނދުކޮޅެއްގެ ތެރޭގައި ކުދިކުދިވެ ވީރާނާ ކޮށްލީ އެވެ. ގުޅުމަކީ ދެމީހުންގެ ހައްގެކެވެ. އެކަމަކު ނެތިފަނާކޮށްލުމުގެ ހުރިހައި ކޮޕީރައިޓްސް ލިބެނީ އެކަކަށެވެ. މިއީ ދުނިޔޭގެ ކޮން ގާނޫނަކުން ލިބިދީފައިވާ އިންސާފެއް ހެއްޔެވެ؟ އަހަރެންގެ ހިތުގައި ޒަހަމް ނޫން އެހެން އެއްވެސް އެއްޗެއް ނެތެވެ. އެހެން މީހަކަށް އަހަރެންގެ ނަފުސުގެ އިހްތިޔާރު މި މިންވަރަށް ދެވުނީ ކީއްވެބާއެވެ؟ އަމިއްލަ ހިތަށް އަމިއްލަ ބާރު ނުފޯރުވުމަކީ ކޮންފަދަ ނިކަމެތިކަމެއް ހެއްޔެވެ؟
އަހަރެންގެ ހާލަތަށް އިހްސާންތެރިކަމެއް ނެތް ހާލުގައި ހަމްދަރުދީގެ މިންވަރެއްވެސް އީތަންގެ ނެތެވެ. އެންމެ ފަހަރަކުވެސް އަހަރެން ހުއްޓުވަން އީތަން އިސްނުނެގި އެވެ. އަހަރެންގެ ލޮލަށް އެންމެ ފަހަރަކުވެސް އީތަން ބަލައިނުލި އެވެ. އަހަރެނންގެ ހާލަތު ދެކިލަންވެސް އޭނާ ބޭނުން ނުވި އެވެ.
އެއީ ދޮގުވެރިއެކެވެ. އީތަންއަކީ އަނިޔާވެރި ހީލަތްތެރި މަކަރުވެރިއެކެވެ.
ދެކަކުލުގައި ބާރަށް ބައްދާފައި މުޅި ހަށިގަނޑު ކޮންޓްރޯލްކުރެވޭތޯ ބެލީމެވެ. ހޯސްލާފައި ފައިބާން ތައްޔާރުވެފައި ހުރި ކަރުނައިގެ ފައްވާރާއަށް ބާރެއް ނުފޯރި އެވެ. ކޯތާފަތުން ކަރުނަ ދެމިގަތެވެ. ޅައުމުރުގައި ފޮރުވި ހުރިހައި ކަރުނައެއް މިވަގުތައްޓަކައި ރައްކާކުރެވިފައި ހުރީކަމަށްވެސް ވެދާނެ އެވެ.
އީތަންގެ އަތުގެ ތެރޭގައި އަހަރެން ފިއްތާލާފައި ރައްކާކޮށްލާ ލޯބި ގޮތް ސިފަވަމުންދިޔަ އެވެ. އަހަރެންގެ ޖޖިސްމުން އުފާތައް ހޯދުމަށް ބީހިލާ ލޯބިގޮތްތައް އަހަރެންގެ ލޯކުރިމަތީން ފެންނަމުން ދިޔަ އެވެ. ހިތް ހަލާކުވުމަކީ މިއީ ހެއްޔެވެ؟ އެހެންކަމަށް ވަންޏާއި ދުވަހަކުވެސް މިފަދަ ލޯތްބެއް ބޭނުމެއް ނޫނެވެ. ހިނދުކޮޅަކަށް ނަމަވެސް އީތަންގެ ހަނދާންތަކާއި ދުރަށް ދެވޭނެ ފޯމިއުލާއެއް ބޭނުމެވެ. ހަދާނީ ކިހިނެއް ހެއްޔެވެ؟ ގޮތްހުސްވެ، ދުނިޔެ ބަނަވުމުން އަނދިރިކަން ނޫނީ އެހީތެރިއެއްކަމުގައި ނުވެ އެވެ.
ދެ ލޯ މަރައިލީ އަނިޔާވެރި އަނދިރިކަމަކުން ތަސައްލީއެއް ލިބޭތޯ އެވެ. ލިބެމުންދިޔަ ވޭންތަކަށް ފަރުވާއެއް ދުނިޔެއިން ލިބޭތޯ އެވެ. މާޒީގެ ތެރޭގައި ފީނީމެވެ. އަހަރެންގެ ހަޔާތުގައި ދުވަހަކުވެސް އުފާވެރިކަމެއް އަމިއްލަކުރެވިފައި ވޭތޯ އެވެ. ލިބެން އޮތް ފަރުވާއަކުން ފުރާނަ ސަލާމަތްކުރެވޭތޯ މާޒީގައި އަތްފުނާ އެޅީމެވެ. ލޯ މަރައިގެން އިނދެ ހިޔާލުގެ ކަނޑުގައި ދަތުރުފެށީމެވެ.
ލޯތްބަށް މި އެދެނީ ހިތް އެދި ގޮވާތީ
ޖާނަށް ދިރުން އަދި ލިބޭތީ
އެދިގެން ބުނީމޭ އޯގާވެދޭށޭ
އުނގުގާ ނިދާހިތް މަ ވާތީ
- - - -
ވާވަރު މިއެންގީ ކެތްދެން ނުވާތީ
ލޯބީގެ މަސްތޭ ވަނީ
އެދުނީ ތިލޯބިން
މުޅިން ހިތް ފުރާށޭ
ލޯބިން އަހާށޭ ހިތާ
- - - -
އަދު ހާމަވާތީ ލޯބިން ބުނާތީ
ފުރިފާ ވަނީ ހިތް އެކީގާ
ގައިމޭ އެދޭނީ ލޯބިން ކިޔާނީ
ވާނަން އެކީގާ ކަލާޔާ
- - - -
އަންނާށެ ލޯބިން އެދިގެން ބުނީމޭ
ގެންދަން މި ޖާނާ ހިތާ
އެދުނީ ތިލޯބިން
މުޅިން ހިތް ފުރާށޭ
ލޯބިން އަހާށޭ ހިތާ
އަހަރެންގެ ދެ ލޯ ހުޅުވާލީމެވެ. އެސްފިޔަތަކުގެ ހަރަކާތް ހުއްޓުނުވަގުތު ލޮލުގެ ކަޅި އެކިދިމަދިމާއަށް އަނބުރާލެވުނެވެ.
ކުޑަދޮރުމަތީން ފުންމައިގެން ތެދުވީމެވެ. އަހަރެން ދެންމެ މި ކުރީ ކީއްހެއްޔެވެ؟ ލަވަ ކީ އެވެ. އާއެކެވެ. އަހަރެން ލަވަ ކީ އެވެ. އަހަރެންގެ އެންމެ މަގުބޫލް ލަވަކިޔުންތެރިޔާގެ އެންމެ ހިތްގައިމު ލަވަ އެވެ. މަރްހޫމް މުހައްމަދު ހުޒާމުގެ އެ ހިތްގައިމު ލަވަ އެވެ. އަނދިރި އެތައް ރެއެއްގެ އަހަރެންގެ ބިރުވެރިކަމާއި އެކަނިވެރިކަން ފިލުވާލަދިނީ އެ ހިތްގައިމު ބަސްތަކެވެ. އޭރު އަހަންނަށްޓަކައި އެބަސްތަކުގައި މާނައެއް ނެތެވެ. ހަމައެކަނި އަސަރުގަދަ ޅެމެކެވެ. ޖާދޫވީ މިއުޒިކެކެވެ. އަޑުއަހައި ފޫހިނުވާ އޮމާން އަޑެކެވެ.
ނަމަވެސް މިއަދު އަހަރެންގެ ކޮންމެ ނާރަކަށް އެބަސްތަކުން އަސަރުކޮށްފި އެވެ. އެއީ މިހިތުގެ އަޑެވެ. މި ފުރާނައިގެ ކޮންމެ ވިންދެއްގެ އަޑެވެ. އަހަރެންގެ އާދޭސްތަކެވެ.
މުޅިގައިން ހީނބިހި ނެގި އެވެ. އެތައް ޒަމާނެއްކޮށްފައި އަހަރެން ލަވަކީ އެވެ. ސަބަބެއް ނެތަސް، އޮތަސް މިއީ އަޖައިބެކެވެ. އިހްތިޔާރަކާއި ނުލައި އެބަސްތައް ހަމަ އެރާގުގައި އެ ހިތްގައިމުކަމުގައި އެ ރާގާއި މިއުޒިކުގެ އެ އަސަރުތަކަށް އަމުނާލައިފީމެވެ.. ދުވަހަކުވެސް މިއުޒިކާއި ލަވައިގެ ތެރެގާއި އަމަލީގޮތުން ޝާމިލްނުވާނެކަމަށް އަހަރެންގެ ނަފުސަށް އަހަރެން ވާނީ ވައުދުވެފަ އެވެ. އެކަމަކު މިއަދު އަހަރެންގެ ފަރުވާއެއްގެ ގޮތުގައި އަހަންނަށް އެހީތެރިވެދިނީ އަހަރެންގެ މިއުޒިކެވެ. އެ ލަވަ އެވެ.
ތުނިކޮށްލާފައިވާ ކެރިގަނޑު އަނެއްކާވެސް ބޯކޮށްލައިފި އެވެ.
ވާރޭގެ ތެރެއަށް ނިކުތީމެވެ. މެންދަމުގެ ފިނިކަމުގައި ބޯވިއްސާރައަކީ މިހައި ހިތްގައިމު އިހްސާސެއްކަމެއް މީގެކުރިއަކުން އަހަރެން ނުދެނަހުރީމެވެ. ލޮލުގެ ކަރުނައާއި މޫނުމަތީގެ ހިތާމައާއި ހިތުގެ ކެކުޅުމާއި މިހަށީގެ ވޭން ފޮރުވަން މިއަށްވުރެން ރައްކާތެރި މަންޒިލެއް ދުނިޔެއިން ލިބޭނެ ހެއްޔެވެ؟ އަލްހަމްދު ލިއްލާހި އެވެ. މެންދަމުގެ މި ބޯ ވާރެއަކީ މިއަޅާއަށްޓަކައި ފަރުވާއެއްކަމުގައި ލެއްވީތީ ﷲއަށް ހަމްދާއި ޝުކުރެވެ!
ކިތަންމެ އަނދިރިޔަސް ގޭގެ ބިއްދޮށު ފަރާތަށް ނިކުތީމެވެ. ހިތުގެ ރިހުމަށްވުރެން ބޮޑު ބިރުވެރިކަމެއް މިރޭ ކުރިމަތިނުވާނެކަން ޔަގީނެވެ. ދެ އަތް ފުޅާކޮށްލާފައި ވާރޭގެ ބަރު ތިކިތަކަށް އަހަރެންގެ ހަށިގަނޑު ހުޅުވާލީމެވެ.
"ރިދީ!" އަހަރެންގެ ނަމުން ގޮވާހެން ހީވެގެން ބަލައިލީމެވެ.
ސިއްސައިގެންގޮސް، ދެ ލޯ ބޮޑުކޮށްލެވުނެވެ. އަހަރެންގެ ކުރިމަތީގައި ހިނިތުންވެފައި، ތެމިފޯވެގެން ހުރީ އީތަން އެވެ. ލިބުނު ހިތްހަމަޖެހުން ސާބިތުކުރުމަށް އަހަރެންގެ ދެ ލޯ ހެކިދޭނެކަން ކަށަވަރެވެ. ލުއި ހިނިތުންވުމެއް ރައްދުކުރީމެވެ. ހަމަ އެ ހިނދުކޮޅެވެ. ލޯ ކުރިމަތީން އީތަން ގެއްލިއްޖެ އެވެ. ވަށައިގެން މުޅި ތަނުގައި އެނބުރުނީމެވެ. ލޮލުގެ ހިމަކޮޅަށް ފެންނާންވެސް އީތތަން ނެތެވެ. ތުންފަތްމަތީން ފާޅުވި ހިނިތުންވުން ފިލައި ހިނގައްޖެ އެވެ. ވަށައިގެންވީ ކަނު އަނދިރިކަން ހިތް ބިރުގަންނަވާލީ އެވަގުތު އެވެ.
ލިބުނު ނާ އުއްމީދުގައި ދެ ލޯ މަރައިލީމެވެ. ފެންނަމުންދިޔައީ އީތަން އެވެ. އީތަންގެ އަތު ތެރޭގައި ހިނިތުންވެފައި ހުރީ ޒާޔާ އެވެ. އެކަމަކު އަހަރެންގެ ބަސްނާހާ އިހްސާސްތައް އާދޭސްކުރަމުންދަނީ ބޭވަފާތެރި އެ އީތަންއަށެވެ. އެމީހަކަށްޓަކައި އަހަރެންނަކީ އެއްވެސް މީހަކަށް ނުވި، އީތަން އަށެވެ. މިއަށްވުރެން އަނިޔާވެރި މަންޒިލެއް ވުޖޫދުގައި މާތްﷲ ލެއްވިބާ އެވެ؟
ތެމިފޯވެގެން އަހަރެން ވަނީ ކޮޓަރިއަށެވެ. ފިނިކަމުގެ އިހްސާސެއް ނުވެ އެވެ. މެންދަމުގެ މި ވަގުތުގައި ހީކެރުވުމަކީ އަހަރެން ދަންނަ ވޭނަކަށް މިރޭ ނުވި އެވެ. ތެތް އެއްޗެހި ބަދަލުކުރާނެ ހިތްވަރެއްވެސް ނެތެވެ. އެކަމަށް ފަރުވާލެއްވެސް ނެތެވެ. އެނދުމައްޗަށް ވެއްޓިގަތީ ވަރުބަލިކަމުގައި އެސްފިޔަތައް ލައްޕާލުމުގެ ބޭނުމުގަ އެވެ.
މެރެމުންދިޔަ ވަރުބަލި އެސްފިޔަތަކުގެ ތެރެއިން ފާހަގަކުރެވުނީ އަހަރެން ލައިގެން އޮތް ޓީޝާޓެވެ. އެއީ އީތަންގެ ޓީޝާޓެކެވެ. އީތަންގެ ހިތްގައިމު ސެންޓުގެ ވަސް، އަހަރެންގެ ނޭފަތުގައި ބީހިލި އެވެ. އިހުނަށްވުރެން ބޮޑަށް އަހަރެންގެ އަތުގެ ތެރެއަށް ޓީޝާޓު ބޮނޑިކޮށްލާފައި ބައްދާލީމެވެ. އިހްތިޔާރަކާއި ނުލައި ބާރަށް ގިސްލެވުނީ ކީއްވެކަން އަހަރެން ބަޔާންކުރާނީ ކޮން ދުލަކުން ހެއްޔެވެ؟
ދުވަހުގެ އެކި ވަގުތުތަކުގައި ކެއި ބޭސްތަކުގެ އަސަރު އަހަރެންގެ ބޮލާއި ލޯ އިހްސާސްކުރަން ފެށީ ރަހްމަތެއްގެ ގޮތުގަ އެވެ. ވާނުވާ ނޭގި، މެންދަމުގެ އެކަނިވެރިކަމުގައި އަހަރެންގެ ހިއްސުތައް ހިމޭން ވެއްޖެ އެވެ. އަމާންކަމެއް، ރައްކާތެރިކަމެއް ނެތް ދުނިޔެއެއްގައި އަހަރެންގެ ދެ ލޯ މެރިއްޖެ އެވެ.
ގަޑިން ވީ އިރެއް ނުވަތަ ކަނުއަނދިރި މެންދަމުން ކިހައި ވަގުތެއްކަމެއް ނޭގެ އެވެ. އަހަރެންގެ އުނަގަނޑާއި ދިމާއިން ކޮންމެވެސް މީހެއްގެ އަތް ހަރަކާތްކުރާކަން އިހްސާސްވި އެވެ. އަހަރެން އޮތް ޖާގައިން ހަށިގަނޑު އެމީހަކާއި ގާތަށް ދަމާލިކަންވެސް ފާހަގަވި އެވެ. ބޮލުގެ ފުށްކިބަ ލައްކޮށްލީ އެމީހެއްގެ ފުޅާ، ތަނަވަސް މޭމަތީގަ އެވެ.
ސިކުނޑި ހަރުއަޑުން އިނޒާރު ދެމުންދިޔައީ އަހަރެންނާއި ދުރަށް އޭނާ ކޮށްޕާލުމަށެވެ. މިއީ ނުރައްކާ އަދި ނނުރަނގަޅު ކަމެއްކަމަށް ސިކުނޑި ބުނެދެމުންދިޔަ އެވެ. އިންކާރު ކުރުމުގެ އިހްތިޔާރެއް ހަށީގައި ނެތަސް ތަކުރާރުކޮށް ސިކުނޑި އިންޒާރުކުރި އެވެ. ކަންފަތުގެ ހިނދުރީގައި ހަރުލީ ހިތްދަތި ޖުމުލަ އެވެ. ތެދެކެވެ. އަހަރެން މިއީ އޭނާގެ ޕަރސަނަލް އެސިސްޓެންޓް އެވެ.
ސިކުނޑީގެ އިންޒާރުތަކަށް އިންކާރުކުރީ އަހަރެންގެ ނިކަމެތި ހިތެވެ. ކުރިއަށްވުރެން ގައިގޯޅިކޮށް އޭނާގެ މޭގައި އަހަރެން ބޮނޑިވެލީމެވެ. ބޭއިހްތިޔާރުގައި ގިސްލުމުގެ އަޑު ނިދީގެ ތެރެއިންވެސް އަހަރެންގެ ކަންފަތަށް އިވުނެވެ. މި ހިތްދަތިކަމާއި ވޭން ލުއިކޮށްދެވޭތޯ އަހަރެންގެ ބޮލުގައި އޭނާ ފިރުމި އެވެ. އިރުއިރުކޮޅުން ބޮލުގެ އިސްތަށިގަނޑުގައި 'ކިސް'ކޮށްލަ އެވެ. ހިމޭން ދުނިޔޭގެ ތެރެއިން ލޮބުވެތިކަމުގެ ހުވަފެނީ ދުނިޔެއަށް ދަތުރުކޮށްދިނީ އަހަރެންގެ ކުޑަދޮރު ކައިރީގައި އަޅުވާފައިވާ ޑްރީމް ކެޗަރގެ އެހީގަ އެވެ.
ފެންނަމުންދިޔައީ އަހަރެން އެންމެ ދެކެން ބޭނުންވި ހުވަފެނެވެ. ކުރެވެމުންދިޔައީ އަހަރެން އެންމެ އެދޭ އިހްސާސްތަކެވެ.
އިން ޝާ ﷲ އަހަރެންގެ އަމާންކަން އަހަންނާއި ބައްދަލުކުރީ އެވެ. އަހަރެންގެ ރައްކާތެރި މަންޒިލް އަހަރެންގެ ހިޔަންޏާއި ދުރަކަށް ނުދާނެ އެވެ.
ހަމަ މިފަދައިން، އޭނާގެ ރައްކާތެރި ކަމަކީ އަހަރެން ކަމުގައިވުމަށް، މިވަގުތުވެސް އަހަރެން އިޒުނަ ދިނީމެވެ.
-ހުރިހައި މާނައެއްގައިވެސް ލޯތްބަކީ ރިހުމެވެ. ރޭގަނޑުގެ މެންދަމުގެ ވަގުތުގައި އެ ހަނދާންތަކުން ތުރާ ނުލިބޭނަމަ އެއީ ލޯތްބެއް ނޫނެވެ. އެ ގުޅުމަކުން ދުރަށްޖެހިލާހިނދު، ހިތްފުނޑުފުނޑުވެ، ޒަހަމްތަކުގައި ވޭން ނާޅާނަމަ އެއީ ލޯތްބެއް ނޫނެވެ.-
(ނުނިމޭ)
