
ނާޒިމް މިހެން ވިދާޅުވެފައި މިވަނީ އިންޓަނޭޓާއި މީޑިއާ ރެގިއުލޭޝަނާ ގުޅޭ ބިލެއް އެކުލަވާލާ މަޖިލިހަށޤ ފޮނުވުމުގެ މަސައްކަތް ކުރަމުން އަންނަކަމަށް ވިދާޅުވުމުން އެކަމާއި ފާޑުކިޔުންތައް އަމާޒުވެފައި ވަނިކޮށެވެ.
އެ ފާޑުކިޔުންތަކަށް ރައްދުދެއްވާ ނާޒިމް އެކްސްގައި ނެރުއްވި ބަޔާނެއްގައި ވިދާޅުވީ މީޑީއާ ރެގިއުލޭޓް ކުރުމާއި ގުޅޭ ގޮތުން އޭނާ ދެއްކެވި ވާހަކަތައް ހަގީގަތް އޮޅޭގޮތަށް ބައެއް މީޑިއާތަކުން ރިޕޯޓްކޮށްފައިވާކަމަށެވެ.
ނާޒިމް ވިދާޅުވީ ރާއްޖޭގައި މީޑިއާތައް ރެގިއުލޭޓްކުރަން މިހާރުވެސް ދެ މުވައްސާސައެއް އޮންނަކަމަށާއި އެހެންނަމަވެސް އެ ތަންވެސް އެންމެ ފުރިހަމަ ގޮތުގައި ހިގަމުން ނުދާކަން މީޑިއާތައްވެސް ގަބޫލު ކުރާކަމަށެވެ. އަދި އެއީ ދައުލަތުގެ ރިސޯސްތައް ޑުޕްލިކޭޓްވުމުގެ އިތުރުން ނަތީޖާ ނުނެރެވޭ ފަދަގޮތަކަށް އޮތް 2 މުވައްސަސާކަމަށެވެ. ނާޒިމް އެ އިޝާރާތްކުރައްވަނީ މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަނަށެވެ.
ނާޒިމް ވިދާޅުވީ 2024 ވަނަ އަހަރުވެސް މި ދެ މުވައްސަސާއަށް ދައުލަތުގެ ބަޖެޓުން ޖުމްލަ 18 މިލިއަނަށްވުރެ ގިނަ ރުފިޔާ ވަނީ ހަރަދުކޮށްފައިވާކަމަށެވެ. އަދި އޭނާގެ މަގުސަދަކީ މި ފަދަ ދޯހަޅި ގޮތްގޮތަކަށް ހުރި މުވައްސަސާތައް ރިފޯމްކުރުންކަމަށްވެސް ނާޒިމް ވިދާޅުވިއެވެ.
ފަހަކަށް އައިސް ޒުވާނުން މުނިފޫހިފިލުވުމުގެ އިތުރުން ޒުވާނުން އާމްދަނީ ހޯދާ އަދި އެމީހުންގެ ޝުއޫރުތައް ފާޅުކުރާ އެންމެ ވަރުގަދަ ޕްލެޓް ފޯމަކީ ސޯޝަލް މީޑިއާކަމަށެވެ. އެހެންކަމުން އެ ޕްލެޓްފޯމްތައް ރެގިއުލޭޓްކުރުމަކީ އެއްވެސް ހާލެއްގައި އެތަކެތި ބްލޮކޮށް ނުވަތަ މީޑިއާގެ މިނިވަންކަމަށް ނިގުޅައިގަތުން ނޫންކަމަށެވެ.
މީޑިއާ އާއި އިންޓާނެޓް ރެގިއުލޭޓްކުރަން ބިލެެއް މި ދައުރުގައި ހުށައަޅުއްވާނެކަމަށް ނާޒިމް ވިދާޅުވުމުން ސަރުކާރުން ވަނީ އެފަދަ ބިލެއް ހުށައަޅަން ނިންމާފައި ނުވާކަމަށް ބުނެފައެވެ.