ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު ކަން ކުރެއްވި ނިހާދު ޓްއަރިޒަމް މިނިސްޓްރީގެ ސްޓޭޓް މިނިސްޓަރުކަމުން ސަސްޕެންޑް ކުރީ ޕީއެންސީ ޖަލްސާއެއްގައި ދެއްކެވި ވާހަކަތަކާއި ގުޅިގެންނެވެ.
އެ ޖަލްސާގައި ނިހާދުވަނީ ރާއްޖޭގައި ހިންގާ ބައިނަލްއަގުވާމީ ޓޫރިޒަމް ބްރޭންޑުތަކުގެ ރިސޯޓުތަކަށް އަމާޒުކޮށް އިދިކޮޅު އެމްޑީޕީން އިސްވެ އޮވެ ޓެރަރިސްޓު ހަމަލާއެއް ދޭން އުޅޭ ކަމަށް ތުހުމަތުކޮށް ވާހަކަ ދައްކާފައެވެ. އެކަމާއި ގުޅިގެން އޭނށާ ސަސްޕެންޑް ކުރީ ޖެހިގެން އައި ދުވަހުއެވެ.
ނިހާދު ފިނޭންސްގެ ސްޓޭޓް މިނިސްޓަރަކަށް ބަދަލުކުރެއްވީ މިދިޔަ ހަފްތާގައެވެ. އަދި މިހާރު އެ މިނިސްޓްރީއަށް ނުކުންނަވަން ވަނީ ފަށާފައެވެ. މިކަން ސަރުކާރުގެ ތަރުޖަމާނުވެސް ވަނީ ޔަގީންކޮށްދެއްވާފައެވެ.
ކުރިން އެމްޑީޕީގައި ހުންނެވި ނިހާދަކީ ވެރިކަން ބަދަލުވި ފަހުން އެމްޑީޕީން ޕީއެންސީއަށް ސޮއިކުރެއްވި 13 މެންބަރުންގެ ތެރެއިން އެއް މެމްބަރެވެ.
