އަބްދުއްރަޙީމް އަބްދުﷲގެ ދަރިކަލުން އިބްރާހިމް ފައިސަލް ޓްއަރިޒަމް މިނިސްޓަރުކަމުގެ މަގާމުން ވަކިކުރައްވާ އެ މިނިސްޓްރީ ހިންގެވުން އިކޮނޮމިކް މިނިސްޓަރު މުހައްމަދު ސައީދާ ރައީސް ޑރ. މުއިއްޒު ވަނީ ހަވާލުކުރައްވާފައެވެ.
ފައިސަލް ވިދާޅުވީ އޭނާ މަގާމުން ވަކިކުރަން ރައީސް އޮފީހުން އެންގެވީ މިއަދު ހެނދުނުކަމަށާއި ސަބަބެއް ބަޔާންކޮށްފައި ނުވާކަމަށެވެ.
ފައިސަލް މަގާމުން ވަކިކުރުމުން އެކްސްގައި ކުރެއްވި ޕޯސްޓެއްގައި އަބްދުރަހީމް ވިދާޅުވީ ފައިސަލް ޓްއަރިޒަމް މނިސްޓަރުކަމުގެ މަގާމުގެ މަސްއޫލިއްޔަތު އަދާކުރީ އިހްލާސްތެރިކަމާއި ތެދުވެރިކަމާއި އެކުކަމަށެވެ. އަދި މަގާމުގައި ހުންނަވާ ނަތީޖާ ނެރެއްދެއްވިކަމަށާއި ދަރިފުޅާ މެދު ފަހްރުވެރިވާކަމަށެވެ.
އަބްދުއްރަހީމް ވިދާޅުވީ މަގާމުން ވަކިކުރިކަން ފައިސަލަށް އަންގާފައިވަނީ މިއަދު އޮފީހަށްވެސް ނިކުންނެވި ފަހުންކަމަށެވެ. އަދި މިކަމުގެ ސަބަބުން ސަރުކާރާއި އެކު ފައިސަލް ނުހުންނަވާނެކަމަށްވެސް އަބްދުއްރަހީމް ވިދާޅުވިއެވެ.
އަބްދުއްރަހީމް ވަނީ އެމަނިކުފާނާއި ރައީސް ޑރ. މުއިއްޒާއި އޮތް ގުޅުން ހީނަރުވެފައިވާކަމަށް ވިދާޅުވެފައެވެ. އެގޮތުން މި ވެރިކަން ފެށިގެން އައިއިރު ރައީސް ޑރ. މުއިއްޒާއި އެކު އޮތް ގުޅުމާއި އިތުބާރު އޮތްނަމަ މިއަދު ފައިސަލް މަގާމުން ވަކިނުކުރާނެކަމަށް އަބްދުއްރަހީމް ވިދާޅުވިއެވެ.
