ހއ. އަތޮޅު މުރައިދޫގެ ރައްޔިތުންނާ ބައްދަލުކުރެއްވުމަށްފަހު ވާހަކަފުޅު ދައްކަވަމުން ރައީސް ވިދާޅުވީ، މިހާރު ހުއްޓިފައި ހުރި މަޝްރޫއުތަކާއި އަލަށް ފަށާ މަޝްރޫއުތައް ކުރިއަށް ގެންދިއުމަށް ސަރުކާރުން ވަނީ ބަޖެޓުގައި ފައިސާ ހިމަނާފައި ކަމަށެވެ.
ރައްޔިތުންގެ ބޭނުންތަކަށް އިސްކަންދީގެން މަޝްރޫއުތައް ކުރިއަށް ގެންދާނެ ކަމަށް ރައީސް ވިދާޅުވި އެވެ. އަދި ކޮންމެ ރަށެއްގައި ވެސް ތައުލީމީ، ސިއްހީ އަދި ކުޅިވަރުގެ ވަސީލަތްތައް ގާއިމުކޮށްދެއްވާނެ ކަމުގެ ޔަގީންކަން ދެއްވި އެވެ.
ރައީސް ވިދާޅުވީ ސަރުކާރުން ކަންކަން އިއުލާންކުރަނީ ރައްޔިތުންނާ މަޝްވަރާކުރުމަށްފަހު ކަމަށާއި، ރައްޔިތުންގެ އަޑު އެއްސެވުމަށްފަހު އެންމެ އިސްކަންދޭންޖެހޭ ކަންކަން ދެނެގަނެގެން ކަމަށެވެ.
ހއ. އަތޮޅަށް ކުރައްވާ މި ދަތުރުފުޅުގައި ރައީސް ވަނީ އެ އަތޮޅުގެ އެކި ރަށްރަށުގެ ރައްޔިތުންނާ ބައްދަލުކުރައްވައި، އެ ރަށްރަށުގެ ތަރައްގީއަށް ކުރަން ރާވާފައިވާ މަސައްކަތްތަކާ ބެހޭ މައުލޫމާތު ހިއްސާކުރައްވާފައެވެ
