ގުރައިދޫގައި އެއަރޕޯޓް ތަރައްޤީކުރުމަށް ބޭނުންވާ ބިން ހިއްކުމަށް ހަވާލުކޮށްފައިވަނީ މިދިޔަ އަހަރުގެ ނޮވެންބަރު 16 ވަނަދުވަހު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ "އެމްޓީސީސީއާ" އެވެ.
އެމްޓީސީސީން ވިދާޅުވީ ގުރައިދޫ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ ދަށުން، ބިން ހިއްކާ ސަަރަޙައްދުގައި ބަންޑު ވޯލް ޖެހުމުގެ މަސައްކަތް މިހާރު ފަށާފައިވާކަމަށެވެ.
ގުރައިދޫ އެއަރޕޯޓް ތަރައްޤީކުރުމަށް ކުރިއަށްގެންދާ ބިން ހިއްކުމުގެ މަސައްކަތުގެ ދަށުން 378،350 ކިއުބިކް މީޓަރުގެ ބިން ހިއްކުމަށްވަނީ ހަމަޖެހިފައެވެ. އަދި 979 މީޓަރުގެ ސަރަޙައްދެއްގައި ރިވެޓްމަންޓް ޖަހާ 609 މީޓަރުގެ ސަރަޙައްދެއްގައި ޖިއޯބޭގް ރިވެޓްމަންޓް ޖެހުމަށްވެސް ހަމަޖެހިފައިވެއެވެ.
ބިން ހިއްކުމުގެ މަސައްކަތް ކުރުމަށް އެމްޓީސީސީއާ ހަވާލުކޮށްފައިވަނީ 106.02 މިލިޔަން ރުފިޔާއެވެ. އަދި މި މަސައްކަތް 300 ދުވަހުގެ ތެރޭގައި ނިންމަންޖެހެއެވެ.
ގުރައިދޫ ކައުންސިލުން ވިދާޅުވީ މިހާރު ހިއްކުމަށް ހަމަޖެހިފައި ބިން އެއަޕޯޓް އެޅުމަށް ޚާއްސަކޮށްފައިވާއިރު މީގެ ކުރިން އެރަށުން ހިއްކާފައިއޮތް 45 ހެކްޓަރު ބިމުގައި ރަށުގެ ލޭންޑް ޔޫސް ޕްލޭނާ އެއްގޮތަށް މަޝްރޫޢުތައް ކުރިއަށްގެންދިއުމަށް ނިންމާފައިވާކަމަށެވެ.
