މި ނާދީ ހުޅުވައިދެއްވީ އެޗްޑީސީގެ ޑެޕިއުޓީ މެނޭޖިން ޑިރެކްޓަރު ފަޔާޒް މަންސޫރެވެ.
ހުޅުމާލޭ ދެވަނަ ފިޔަވަހީގެ ހިޔާ ޓަވަރު 8 ގައި ގާއިމުކޮށްފައިވާ މި ނާދީގައި އިސްރަށްވެހިންނަށް ބޭނުންވާ ހުރިހާ ވަސީލަތްތަކެއް ހިމަނާފައިވެއެވެ. މީގެ ތެރޭގައި ހެލްތު ސްކްރީނިންގް ހެދޭނެ އިންތިޒާމާއި، އަވަސް ފަރުވާދޭ ކޮޓަރިއާއި، ނަމާދު ކޮޓަރިއާއި އަދި ބަދިގެ ހިމެނެއެވެ.
ނާދީގައި އިސްރަށްވެހިންނަށް އެއްވެ، ހިތްހަމަޖެހިލައި އަރާމުކޮށްލެވޭނެ ސަރަހައްދުތަކާއި، ފޮތް ކިޔުމަށް ހާއްސަކޮށްފައިވާ ޖާގަތައްވެސް ހުންނާނެއެވެ. މި ނާދީއަކީ ހާއްސަ އެހީއަށް ބޭނުންވާ ފަރާތްތަކަށްވެސް ފަސޭހައިން ވަދެނިކުމެވޭ ގޮތަށް ފަރުމާކޮށްފައިވާ ތަނެކެވެ.
އެޗްޑީސީގެ ސީއެސްއާރުގެ ދަށުން ތަރައްގީކޮށްފައިވާ މި ނާދީ ހިންގުމާ ހަވާލުވެފައިވަނީ ޖެންޑާ މިނިސްޓްރީންނެވެ. ނާދީ ހުޅުވިފައި ހުންނާނީ ހުކުރު ހޮނިހިރު ފިޔަވައި ކޮންމެ ދުވަހަކު ހެނދުނު 8:00 އިން ހަވީރު 6:00 އަށެވެ.
