
ޓެޑްރޯސް މިހެން ވިދަޅުވެފައިވަނީ ސްވިޒަލެންޑުގެ ޖެނީވާގައި ކުރިއަށްދާ ޑަބްލިޔުއެޗްއޯގެ 156ވަނަ އެގްޒެކެޓިވް ބޯޑު ބައްދަލުވުމެ ހަވާސާގެ ތެރެއިން ހެލްތު މިނިސްޓަރު އަބްދުﷲ ނާޒިމް އިބްރާހީމްާއި އެކު ބޭއްވި ބައްދަލުވުމެއްގައެވެ. މިނިސްޓަރު ނާޒިމް މި ބައްދަލވުމުގައި ވައިވެރިވެޑައިގަންނަވާފައިވަނީ ދެކުނު އިރުމަތީ އޭޝިއާ ސަރަހައްދު ތަމުސީލުކުރެއްވުމަށް އެގްޒެކެޓިވް ބޯޑުގެ މެންބަރެއްގެ ގޮތުގައެވެ.
މި ބައްދަލުވުމުގައި މިނިސްޓަރު ނާޒިމް ވަނީ ރާއްޖޭގެ ސިއްހަތާގުޅޭ ސިޔާސަތުތައް ޓެޑްރޯސްއާ ހިއްސާކުރައްވާފައެވެ. އެގޮތުން، ރާއްޖޭގެ ރަށްރަށުގައި ޓެލެމެޑިސިންގެ ޚިދުމަތް އިތުރަށް ފުޅާކުރުމާއި، ސިއްހީ ހިދުމަތްތަކުގެ ފެންވަރު ހިފެހެއްޓުމާގުޅޭ ގޮތުން ވަނީ މަޝްވަރާކުރައްވައިފައެވެ.
ރާއްޖެއިން ޑިޖިޓަލް ހެލްތު އަދި ޓެލެމެޑިސިން ފުޅާކޮށް، ޕްރައިމަރީ ހެލްތު ކެއާ ހަރުދަނާކޮށް، ހެލްތު ސިސްޓަމް ފައިނޭންސިން ރަނގަޅުކުރުމާއި، ނޭޝަނަލް ހެލްތް އިންޝުއަރެންސް ސްކީމް މެދުވެރިކޮށް ހުރިހާ އެންމެންނަށް ހިދުމަތް ފޯރުކޮށްދިނުމަށް ކުރާ މަސައްކަތް ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން އެހީތެރިކަން ލިބޭނެކަމަުގެ ޔަގީންކަން މި ބައްދަލުވުމުގައި ޓެޑްރޯސް ވަނީ ދެއްވާފައެވެ.