މިއަހަރަށް މަޖިލިސް ހުޅުވުމާއި ރިޔާސީ ބަޔާން އިއްވި ޖަލްސާއަށް ފަހު ނޫސްވެރިންނާއި ވާހަކަ ދައްކަވަމުން ގާސިމް ވަނީ ގައުމުގެ މަސްލަހަތު ނަގާލުމަށް އިދިކޮޅު ފަރާތްތަކުން މަސައްކަތް ކުރާކަމަށް ތުހުމަތުކުރައްވާފައެވެ.
އެގޮތުން ރާއްޖެއިން ދައްކަންޖެހޭ ލޯނުތަކާއި އެހެނިހެން ކަންކަމަށް ފައިސާ ހޯދަންޖެހޭއިރު ގައުމުގެ މަސްލަހަތު ނަގާލުމުން ބޭރުގެ ފަރާތްތަކުން ރާއްޖެއަށް އެހީ ނުލިބޭނެކަަން ފާހަގަކުރައްވާ އިދިކޮޅު އެމްޑީޕީގެ ބޭނުމަކީވެސް އެއީކަމަށްް ގާސިމް ވަނީ ތުހުމަތުކުރައްވާފައެވެ. ގާސިމް ވިދާޅުވީ ހިޔާނާތުގެ މައްސަލަތަކުގައި ކޮންމެ ބޭފުޅަކަށް ވިޔަސް ކެރިވަޑައިގެން ރައީސް މުއިއްޒު ފިޔަވަޅު އަޅުއްވަމުން ގެންދަވާކަމަށެވެ. އެހެންކަމުން މަގުމައްޗަށް ނުކުމެ ހަލަބޮލިކޮށް ނުލާ ކަންކަން ރަނގަޅުކުރަން ރައީސްއަށް ފުރުސަތު ދެއްވަންޖެހޭނެކަމަށް ގާސިމް ވިދާޅުވިއެވެ.
ގާސިމް ވަނީ ދެން އޮންނަ އިންތިހާބާއި ހަމައަށް ކެތްރެިކަމާއި އެކު މަޑުކުރުން އިދިކޮޅު ފަރާތްތަކަށް ގޮވާލާފައެވެ. އަދި މިއަދު ރައްޔިތުން މަޖިލީހުގައި ރިޔާސީ ބަޔޔާން ިއއްވުމާއި ދިމާކޮށް އެމްޑީޕީން ކުރިޔަށް ގެންދިޔަ އިހްތިޖާޖަށްވެސް ގާސިމް ވަނީ ފާޑު ވިދާޅުވެފައެވެ.
ގާސިމް ވަނީ އެމްއެމްޕީއާރުސީގެ މައްްސަލާގައިވެސް ރައީސް ޔާމީނަށްވެސް ފާޑު ވިދާޅުވެފައެވެ. އެގޮތުން ޕީޕީއެމްގެ ބައެއް މެމްބަރުންނަށް އެ ފައިސާ ލިބުނު ިއރު އެއީ ކޮން ފައިސާއެއްކަން ނޭގުނު ނަމަވެސް ރައީސް ޔާމީންއަށް ލިބުނީ އެ ފައިސާކަން އެމަނިކުފާނު ވިދާޅުވިކަމަށް ގާސިމް ވިދާޅުވިއެވެ. އެހެންކަމުން އެ މައްސަލަތައް ބަލާ ފިޔަވަޅު އަޅަންޖެހޭކަަމަށްވެސް ގާސިމް ވިދާޅުވިއެވެ.
