މިއީ ރޯދަ މަހަށް ތައްޔާރުވުމުގެ ގޮތުން އެސްޓީއޯއިން ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.
އެސްޓީއޯއިން މިރޭ ދިން މައުލޫމާތުގައި، މިވަގުތު ރާއްޖޭގައި ލުނބޯ ލިބެން ދަތިވެފައިވާތީ، އަގު މައްޗަށް ގޮސްފައިވާ މައްސަލަ ހައްލުކުރުމަށް މި ޝިޕްމަންޓް ވަރަށް ބޮޑަށް މަގުފަހިވާނެ ކަމަށް ބުންޏެވެ. އަދި ލުނބޯގެ އަގު ތިރިވެގެންދާނެ ކަމުގެ ޔަގީންކަން ވެސް ދީފި އެވެ.
އެސްޓީއޯއިން ރޯދަ މަހަށް ތައްޔާރުވުމުގެ ގޮތުން ހަތަރު ކެޓެގަރީއަކަށް ބަހާލައިގެން ކާބޯތަކެތި އެތެރެކުރުމުގެ މަސައްކަތް ކުރަމުންދެ އެވެ. މީގެ ތެރޭގައި އަސާސީ ކާބޯތަކެއްޗާއި، ތާޒާ ތަރުކާރީއާއި މޭވާގެ އިތުރުން، ޕްރޮސެސްޑް ކާނާއާއި ކެއްކުމަށް ބޭނުންކުރާ ތަކެތި ހިމެނެ އެވެ.
އެސްޓީއޯއިން ބުނި ގޮތުގައި ކުންފުނީގެ މައިގަނޑު އެއް މަގްސަދަކީ ޒަރޫރީ ބޭނުންތަކަށް ބޭނުންވާ މުދާ ފަސޭހައިން ލިބޭނެ އިންތިޒާމު ހަމަޖައްސައިދިނުމެވެ. އަދި ރޯދަ މަހާ ދިމާކޮށް، ބޭނުންވާ ޒަރޫރީ ހުރިހާ އެއްޗެއް ހެޔޮ އަގެއްގައި ރައްޔިތުންނަށް ފޯރުކޮށްދިނުމަށް މަސައްކަތް ކުރަމުންދާ ކަމަށް ވެސް ބުންޏެވެ.
