ޝަރުއީ ދާއިރާގެ އިސް މުވައްޒަފުންގެ މުސާރައިން 10 އިންސައްތަ ކުޑަކުރެއްވުމަށް އެދިވަޑައިގެން މަޖިލީހަށް ރައީސް މިއަދު ހުށަހެޅުއްވިއިރު، ޝަރުއީ އަހަރު ފެށުމަށް ބާއްވާ ރަސްމީ ޖަލްސާ މާދަމާ ބޭއްވުމަށް އަންނަނީ ތައްޔާރުވަމުންނެވެ. ފަނޑިޔާރުންނާއި ޝަރުއީ ދާއިރާގެ މުވައްޒަފުން ބައިވެރިވާ މި ޖަލްސާގައި ރައީސް ވެސް ބައިވެރިވެވަޑައިގަންނަވާނެއެވެ.
ޝަރުއީ ދާއިރާގެ އިސް މުވައްޒަފުންގެ މުސާރައިން 10 އިންސައްތަ ކުޑަކުރުމަށް ރައީސް މަޖިލީހަށް ހުށަހެޅުއްވިއިރު، މީގެ ތިން މަސް ކުރިން ރައީސްވަނީ ޝަރުއީ ދާއިރާގެ ހުރިހާ މުވައްޒަފުންގެ މުސާރަ މި އަހަރު ބޮޑުވާނެ ކަމަށް ވައުދުވެވަޑައިގެންފައެވެ. އެއީ ވެރިކަމަށް އެއް އަހަރު ފުރިގެން، މާލޭގައި ބޭއްވި ޖަލްސާގައެވެ. އެ ޖަލްސާގައި ވާހަކަ ދައްކަވަމުން ރައީސްވަނީ ޝަރުއީ ދާއިރާގެ ހުރިހާ މުވައްޒަފުންގެ މުސާރަ މި އަހަރުގެ ތެރޭގައި ބޮޑު ކުރާނެ ކަމަށް ވައުދުވެވަޑައިގެންފައެވެ.
އިގްތިސާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ މަގްސަދުގައި، ކުރިއަށް އޮތް ދެ އަހަރު ދުވަހުގެ މުއްދަތަށް އެޅުމަށް ނިންމާފައިވާ ފިޔަވަޅުތަކާ ގުޅޭގޮތުން ރައީސުލްޖުމްހޫރިއްޔާ ފޮނުއްވާފައިވާ ސިޓީ، މަޖިލީހުގައި މިއަދު އިއްވާފައިވާއިރު، އެ ސިޓީގައި ރައީސް އެދިވަޑައިގެންފައިވަނީ، ޝަރުއީ ދާއިރާގެ އިސް މުވައްޒަފުންގެ މުސާރަ، ކުރިއަށް އޮތް ދެ އަހަރު ދުވަހަށް ކުޑަ ކުރުމާމެދު މަޖިލީހުން ގޮތެއް ނިންމެވުމަށެވެ.
"އިގްތިސާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ މަގްސަދުގައި، ކުރިއަށް އޮތް ދެ އަހަރު ދުވަހުގެ މުއްދަތަށް އެޅުމަށް ނިންމާފައިވާ ފިޔަވަޅުތަކުގެ ތެރޭގައި މިނިވަން މުއައްސަސާތަކުގެ އިސްވެރިންގެ އަސާސީ މުސާރަ 12000 އަށްވުރެ މަތިން ލިބިވަޑައިގަންނަވާ މަގާމްތަކުގެ އަސާސީ މުސާރައިން 10 އިންސައްތަ އުނިކުރުމާމެދު ރައްޔިތުންގެ މަޖިލީހަށް ހުށަހަޅުއްވައި ދެއްވައި އެ މަޖިލީހުން ނިންމަވާ ގޮތެއް އަންގަވައިދެއްވުން އެދެމެވެ. އަދި ދަންނަވަމެވެ. ޝަރުއީ ދާއިރާގެ އިސްވެރިންނާއި ރައްޔިތުންގެ މަޖިލީހުގެ މެންބަރުންގެ އަސާސީ މުސާރައިން 10 އިންސައްތަ އުނިކުރުމަށް މަޖިލީހަށް ފެނިވަޑައިގަންނަވާނަމަ، އެކަންވެސް މަޖިލީހަށް ހުށަހަޅުއްވައި ދެއްވައި އެ މަޖިލީހުން ނިންމަވާ ގޮތެއް އަންގަވައި ދެއްވުން އެދެމެވެ". ރައީސްގެ ސިޓީގައި މިއަދު ވިދާޅުވެފައިވެއެވެ.
