
ކުރުނބާ ރިސޯޓުގައި ބޭއްވި "އަންލޮކިން ޖަސްޓިސް" ބައްދަލުވުމުގައި ވާހަކަފުޅު ދައްކަވަމުން އުއްތަމަ ފަނޑިޔާރު ވިދާޅުވީ، ކޮންމެ އަހަރަކު 2000 އާ މައްސަލަ ކޯޓުތަކަށް ހުށަހެޅޭ ކަމަށެވެ. އަދި މިކަމަކީ ކަންބޮޑުވާންޖެހޭ ކަމެއް ކަމުގައި އެމަނިކުފާނު ފާހަގަކުރެއްވިއެވެ.
ޒަމާނުއްސުރެ ދިވެހިންނަކީ އޯގާތެރި ބައެއް ކަމަށް ވިދާޅުވި އުއްތަމަ ފަނޑިޔާރު، މިހާރު މުޖުތަމައުގެ ސިފަތައް ބަދަލުވަމުން އަންނަކަން ފާހަގަކުރެއްވިއެވެ. އަދި މިކަމަށް ހައްލު ހޯދުމަށް އަދުލު އިންސާފުގެ ނިޒާމަށް ވަށާޖެހޭ ބަދަލުތަކެއް ގެންނަން ޖެހޭކަމަށް ވިދާޅުވިއެވެ.
އަދުލު އިންސާފުގެ ނިޒާމު ހަރުދަނާކުރުމަށް މިހާރު ޑިޖިޓަލައިޒޭޝަންގެ މަސައްކަތްތަކެއް ކުރިއަށްދާކަމަށާއި، މިކަމުގެ ސަބަބުން އަވަސް އިންސާފު ލިބިގެންދާނެކަމަށް އުއްތަމަ ފަނޑިޔާރު ވިދާޅުވިއެވެ. އަދި މި މަސައްކަތުގައި ހުރިހާ އިދާރާތަކެއް ގުޅިގެން މަސައްކަތްކުރުމުގެ މުހިންމުކަން ވެސް ފާހަގަކުރެއްވިއެވެ.